Québec solidaire - Kanienʼkéha

Aiakwaterihwahténtia’te ne aonhá:’a tioiánere karihwahserón:ni ne taiakwá:tahste tsi tewatténies tsi nikaiérha tsi niwakehnhò:tens

Aiethiia’tanónhstate ne kahwatsire’shón:’a tsi wathará:tats tsi ní:kon ronatkaró:ton

Taiakwani’tonniáhsi tsi iah tewá:tons ahatinonhsatshén:ri tánon aiethiiate’shenná:wi raoná:wen akénhake tsi thotinonhsó:ton ne nithotiiòn:sas

Aonsaiakwakwatá:ko ne ata’karitétshera iotiio’ténion tóka’ naiakwate’nikonhraié:ta’te tsi nonká:ti ne ohén:ton taká:tahste nok kanakerahserá:kon

Taiakwaié:na ne Onkwehón:we aiakwakwatá:ko tsi niiontionhwentsiò:ten ne akwé:kon raoná:wen akénhake

Né:’e tsi ià:ia’k nihá:ti Onkwehón:we ratihsén:nare tsi tehonnitiohkwakenniónhe, Québec Solidaire iákwehre aiethihrharáhthenhste ne Othore’kehró:non nok Onkwehón:we ne National Assembly. Tiotierenhtáhkwen niiawén:’on tsi ken’ niionkwè:take ratiià:tare ne onkwanèn:ra ne Québec nón:we. Né:ne Onkwehón:we tehatikenniónhe ne Maïtée Labrecque-Saganash ne Ungava nón:we, Benjamin Gingras ne Abitibi-Est nón:we, Michaël Ottereyes ne Roberval nón:we, Gérard Briand ne Saint-Laurent nón:we, Jacques Thériault-Watso ne Nicolet-Bécancour nón:we tánon Uapukun Mestokosho ne Duplessis nón:we.

Arenhátien ónhka ní:’i, arenhátien tsi nitionkwé:non, akwé:kon ne shá:ka nahò:ten teionkwatonhwentsió:ni: Sénha aionkwatonhnhe’tsheriióhake ón:wa wenhniserá:te tánon tio’nikonhrakétskwa’t akénhake ne enióhrhen’ne. Tsi nonká:ti tsi niiá:kon rotikwatákwen tsi niiontionhwentsiò:ten tánon tsi niiá:kon ienhatihahserenhá:wi: sewaianerenhserá:ien ne Québec akénhake né:ne rotiia’takéhnha’s ne thiionkwe’taténion. Ne aorì:wa tsi kahkwísrons. Né:’e aorì:wa tsi ken’ iákwe’s ne Solidaire onkwanèn:ra.

Iah teiorihwenhtá:’on taionkhiwennáhkwake nia’tekanèn:rake né:ne tehotiia’tahsihará:’on ne wahonnise’kénha tánon ne orihwakaion’néha ratikoráhstha. Tsi niiá:kon iah othé:nen thaiontsteríhstahkwe ne kaweienhstà:tshera. Tsi niiá:kon ronnonhtónnion tsi nek ne tsi’tá:wis raoná:wen ne o’nikòn:ra aota’karitétshera tekarihwáhsnie. Tsi niiá:kon iah othé:nen tehshakotiió’tats tsi tehati’tsiónhstha tsi iohwentsiá:te. Ó:nen ieióhe asé’tsi aetewakorahseraráhthenhste.

Québec Solidaire tionkwehtáhkwen tsi Onkwehón:we ahotiianerenhseraién:take tsi rontathá:wi né:’e enwá:ton naiá:wen tóka’ taiakwarihó’kwahte ne Onkwehón:we nok Othore’kehró:non tsi nihonen’nahsò:tens tánon sha’teiótte tsi eniethiiate’shenná:wi ahonata’karite’tsheraién:take nok ahotiia’takehnha’tsheraién:take, ne kwah raotirihwà:ke ne tsionathonwí:sen nok ratiksa’okón:’a.

Kwah nó:nen eniakwatkwé:ni, Québec Solidaire eniakwahkwísron taontakaié:ri’ne ne Onkwehón:we ratiksa’okón:’a raotirihwà:ke né:ne ronatia’tahtón:’on tóka’ni ronwatiia’tatshénrion tsi rotiia’táten ne shakoti’terontáhkwa tsi ionterihwaienhstáhkwa.

Tóka’ aionkhirihwá:wi, teniakwaié:na ne kanakerahsera’shón:’a ne aiationhwentsiakahrháhtho akwé:kon tsi ionterihwaienhstáhkwa tánon eniakwahténtia’te tsi tsi enkarihwisákhon tsi nahotiià:tawen ne ronenhé:ion. Eniakwarihwahserón:ni tsi enwá:ton ne kahwatsire’shón:’a ahonterihwahténtia’te aonsahshakonehiahráhkwen ne ki’ tahshakotirénhsaron ne shakotinoronhkwa’kénha.

Québec Solidaire eniakwakwatá:ko tsi Seskehkó:wa 30 shískare entewentanorónhstonke ne ki’ taiethirénhsaron ne ronatia’tahtón:’on ratiksa’okón:’a, ia’tehonatatén:ron, raotihwatsire’shón:’a tánon raotinakerahsera’shón:’a, tánon entewatáhsawen ne kató:ken tsi skén:nen iensewá:ton tsi na’tetewátere ne Tsi niiontionhwentsiò:tens.

Ó:nen ieióhe akarihwanhotónkwen ne kaianerénhsera takakà:nerake ne kahswéntshera ne Onkwehón:we nok Othore’kehró:non nonká:ti. Tiotierénhton tsi nenkaié:ren ne ken nonká:ti ne taiakwaianerénhserahkwe ne “Joyce’s Principle.”

Eh né:'e kén:ton iakoia'takarénies akaién:take tsi kanatowá:nens nok nikanatà:sas, nahò:ten sha’oié:ra akanonhstá:tonke tánon kanatowá:nens nok nikanatà:sas tsi nón:we tsi na’teiowá:nen sha’oié:ra tánon tsi nihononhnhe’tsherí:io’s sha’tékena akénhake.

Tóka’ ken’ niiohsnó:re entitewatkón:tahkwe, é:so ká:ien ne karihón:ni aontaiakéhtahkwe tsi Québec thaionkwaianeráhsten nahò:ten iakwanién:te ne taiakwá:tahste tsi wathará:tats tsi wa’tarihà:tha tsi iohwentsiá:te. Ne CAQ iah nek ne teiorihwanorónhon, né:’e tsionkwakà:kton né:’e tsi rotirihwá:wi ne kentiohkowá:nens tehati’tsiónhstha tsi iohwentsiá:te.

Québec Solidaire eniakwarihwà:ren ne karihwahserón:ni tsi “carbon neutral” ienwá:ton’ne ne Québec ohén:ton ne 2050 neniohsero’ténhake. Eniakwakwatá:ko tsi enwá:ton kwah tsiok nón:we niá:ien Québec nón:we tánon iah tha’taiotonhwentsiohónhake ne kà:sere aiakoién:take. Sénha eniakwanónhstate onkwá:wen tsi kanonhstá:ton, tsi iothnekahtentionhátie tánon tsi karharónnion tsi ní:ioht ne onatia’kéhshon nikanenhrò:ten nihonatié:ren tsi náhe ne Québec shitiotahsawáhkwen.

Tenhserihwáhsnie’ne tsi iohwentsiá:te tóka’ Québec Solidaire tahsanitiohkwakén:ni.

Tóka aiethinotió'tatshe tsi ní:kon iontatkarótha, enwá:ton aionthwistaweièn:ton ne $850 nikahwístake tsiohserátshon.

Ne ò:ni thaosénhshon neniakwanonhsaketskohà:ton né:ne á:se, nok karihwakweniénhstha tsi na’teiowá:nen sha’oié:ra tánon enhonerien’tiióhsten ne thaosénhshon kahwatsire’shón:’a ohwentsiakwé:kon ne Québec. Tsi ienwatéhsa, Québec Solidaire enionkwanonhsaketskohà:ton ne 50,000 nikanónhsake tánon sénha enwatié:sake ne Onkwehón:we tsi kanatowá:nens ratinákere ahatinonhsatshén:ri.

Ne sótsi é:so nikahwatsí:rake raotirihwà:ke, iah thaón:ton ahotinonhsaién:ta’ne. Québec Solidaire entiakwahténtia’te ne karihwahserón:ni aiakwanonhsahninónnion tánon sénha watié:sen eniethiiatenhninónnion.

Eniakwaianerenhseróhetste ne kahnhà:tshera aorihwà:ke ne aontonnónhton tsi ní:ioht tsi ronwatíhnha’s tánon enwatò:ktahse tsi iah teiontatkarià:kse ne raotihnhà:tshera; entiakwatáhsawen aontaiakwa’serón:nenhte tsi ní:kon iontatkarótha aionteweienhstà:ne tsi ionterihwaienhstahkwa’kó:wa, tsi ienwatéhsa iah othé:nen thaiotkaró:take.

Ne ki’ aiakwarihwahní:rate tsi ioiánere tsi tehotihsnié:’on ne ionteweienhstahkwa’shón:’a, Québec Solidaire entiakwa’serón:nenhte tsi ní:kon ronwatikarià:kse ne ratirihwaienté:ri ahonwatíhnha'ne tánon eniakwahténtia’te tsi á:se ensewatenonhsahserón:ni, eniakwanonhsówanahste, sénha óhonte nenwahsóhkwawen tánon eniakwanonhsakétsko ne ki’ aiethí:ion ne ronteweiénhstha nok ronwatirihonnién:ni ne sénha akanonhstá:ton ne ionterihwaienhstahkwa’shón:’a.

Ne ki’ sénha aioiáneren tsi iethirihonnién:ni tahatikonhsotóntie ne Onkwehón:we raotirihwà:ke, Québec Solidaire entsiakwahiatonhserakwatakohà:ton ne enwatena’tón:ni ne Onkwehón:we raotirihwà:ke, ne kwah iorihwà:ke ne onwa’kékha raotikara’shón:’a, tsi tehonwanonhwentsiáhkwen tánon nahò:ten nahotirì:wawen.

Tsi ní:ioht tsi tó:kenske niiá:wen’s, tka’seronnénhton se’ tsi ronate’shennaién:ta’s ahotiia’takehnha’tsheraién:ta’ne.

Legault raotióhkwa ne shá:ka shonkwatehrharatstén:ni tánon shé:kon rotinoròn:se ne Québec. Ionkwanahkontá:ni tsi iakwate’niéntha aiakwatken’tó:ren tsi kahré:’on. Neniakwá:iere se’ nahò:ten teiotonhwentsióhon ne kwah tokén:’a aonsaiakwaie’wén:ta’ne.

Enionkwakwatákwen ahotiio’ténionke ne CLSC 24/7 enwatehnhotónkwenke tahonwatíhsnie’ne kanakerahserakónhshon. Eniakwatò:ktahse ne rotihrhá:re kahsennarónnion ne o’nikòn:ra aorihwà:ke nikaia’takehnha’tsherò:tens, ahse’kén o'nikòn:ra nikaia’takehnha’tsherò:ten né:’e ne ata’karitétshera teiontáthsnie.

Ne ò:ni eniakwakówanahte tsi ní:kon wathwistaweièn:ton aonhténtia’te ohén:ton tekatáhstha nikaia’takehnha’tsherò:tens, né:ne iotkà:te iotkwì:ton tsi ní:ioht tsi nikaié:ren nón:wa. Ahse’kén ne ata’karitétshera aorihwà:ke, ohén:ton taká:tahste né:’e aonhá:’a tioiánere taiakóhsnie’ne.

Akwé:kon rotiianerenhserá:ien tsi thotinónhsote tahotí:ion’ne, karenhsarónhsera enhatihá:wi, tehonwatiià:taton ne raotihwá:tsire. Ne nón:wa Québec ratikarià:kse 5 na’teiothna’néten ká:ro nón:we ne tiakonónhsote taiontáthsnie tsi ní:ioht ne Netherlands nok Denmark. Québec Solidaire teniakwahna’néta tsi niionkwè:take rotiksténha né:ne tsi thotinonhsó:ton tehonwatíhsnie, ne ki’ thikén:’a enkénhake tsi tiakonónhsote taiakó:ion’ne.

Québec Solidaire iákwehre akwaié:nawa’se tsi wathará:tats tsi niwatkaró:ton ne aiakónhnheke. Ne aorì:wa tsi iethiia’tarò:ron ratihsén:nare né:ne ronaterihwaweiénhston ne ohwísta aorihwà:ke, ne eh karátie ne Haroun Bouazzi, assistant vice president ne ionthwistahsteríhstha ne SME, Mathieu Dufour tánon Simon Tremblay Pepin, iathwistaweiénhstha tánon shakotirihonnién:ni, Alejandra Zaga Mendez, ierihwaienté:ri ne ionhwentsianónhnha nikahwistò:tens, tánon Christine Gilbert, CPA, MBA, iakorihonnién:ni tsi nón:we ne Université Laval tánon ne Québec ronatkaró:ton ierihwaienté:ri.

Ió:kenht tsi niionkwa’nikonhrò:ten ne onkwanèn:ra: teionkwatonhwentsió:ni ne akarihwahserón:nike né:ne enhotiié:nawa’se ne kahwá:tsire, nithotiiòn:sas tánon ne thotí:ion’s ne raotihwísta aorihwà:ke. Tóka’ Québec Solidaire enwatkoráhston, eniakwanotió’tatshe tsi watkowanáhtha ne ka’shatstenhserenhá:wis iontatkarótha. Ne ò:ni eniakwatò:ktahse ó:ia iontatkarótha kwah né:ne ionteweienhstáhkwa iontstahkwa’shón:’a, eniakwahténtia’te ne thiionkwe’taténion shonwatinawirakwatákwas enwatkarià:khon tánon sha’tewahsén:nen entiakwa’serón:nenhte tsi ní:kon eniekária’ke iakoia’takarénies aiontíta.

E’thó:ne eniakwatò:ktahse ne tiowénhte watkarótha ne nahò:ten teiotonhwentsiohon’ón:we aiehní:non tsi ní:ioht ne kákhwa, onoharè:tha, onónhkwa, tánon ahkwénnia tsi nikarì:wes waterihwentó:re tsi watkowanáhtha tsi ní:kon iekarià:kse aiakónhnheke.

Ieská:konte, eniakwahará:tate tsi ní:kon entá:’onk ará:ne aiontatkária’kse aiakoió’ten tsi niió:re ne $18 nikahwístake skátshon tsi kahwistá:’ks ne káti ne rotí:tenht nithotiiòn:sas nok kahwá:tsire enhotinaktó:take ahontón:rie. Entá:’onk ò:ni aiakwakówanahte ne Québec pension karihwahserón:ni ne ahotiia’takéhnha ne rotiksténha né:ne kwah nihotirì:wawen’s tsi wathará:tats tsi ní:kon iekarià:kse aiakónhnheke.

Sénha é:so teiotonhwentsió:ni ne Québec tsi ní:ioht ne kakorahserasé’tsi. Teiotonhwentsió:ni á:se ensewatkorahserakwatákwen. Québec Solidaire nón:we, iakwahkwísrons aiakwatathá:wi iah ahse’kén teiethitshá:ni’s ne “thihononhwentsiaténion” tóka’ni ionkwahterón:ni aionkwaia’táhton’ne, nek tsi ahse’kén teionkwatonhwentsió:ni á:se aonsaionkwanakerahseraién:ta’ne. Teionkwatonhwentsió:ni akwé:kon á:se aonsaiethinakerahserakwatákwahse. Né:ne iakwa’shátste, ionkwa’nikonhratshá:ni né:’e iakwakwénies aiethihnhotónkwahse ne akó:ren.

Tóka’ aiakwatathá:wi tsi niiontionhwentsiò:ten né:’e aonhá:’a tioiánere ní:ioht tsi tenwatenakerahseraténionke. Ne ki’ taiakwaté:ni tsi iohwentsiá:te, entá:’onk kén:tho entiakwatáhsawen, Québec nón:we. Iákwehre aiakwanónhstate tsi na’teiowá:nen sha’oié:ra tánon aiethiiatia’táhrhahse né:ne aonhá:’a óhonte nithonahsohkwawén:’on tsi iohwentsiá:te, nek tsi Québec iokarón:ni tsi kaniahè:sas ne Koráhne awenié:na niiorihò:ten. Tóka’ sénha entsiakwaiánerahste tsi ní:ioht tsi tionnhétie, entá:’onk akwé:kon aontaiakwanónhton ne onkwahwísta aorihwà:ke. Teionkwatonhwentsió:ni aiakwarihwahserón:ni ne ohén:ton taionkwenhniseraientóntie tánon enionkwakwatákwen taionkwarihwaienawa’konhátie ne Onkwehón:we, nek tsi Koráhne tiowénhte ne aoianerenhsera’shón:’a né:’e kaió’tats tsi ní:kon iakwakwénies eh naiakwá:iere.

Atatewenniio’tshera’ón:we né:’e kén:ton aionkwa’shatstenhseraién:take taiakwaia’torehtánion. Ne ok ní:ioht tsi enwá:ton ken’ naiá:wen né:’e tóka’ aiakwakwatá:kon aiakwatathá:wi tsi niiontionhwentsiò:ten ne Québec.