Ushkat tshekuan ua tutamat

Tshe atushkatamat anu uet minuat tshetshi ut tashikamat aishpanit tshishikut

Tshe tshishpeuatamat uikanishimauat ishpish amatshuepannit inniunnu shuniau e uitakanit

Tshetshi minupanitaiat ishpish eka takuak anite tshe apinanut mak tshetshi minakaniht anitshenat peiku aianishkat tshetshi katshitinahk anite kaipinannut

Tshetshi tutakanit kassinu auen tshetshi apashtat peiku assinu, e shassinitishunanut ashit innuat

Uepishtikueiau-assi kushtikuannu shash anite etat utipatshimunit. Tshetshi tutakanit tshekuan ume 21 tatutshishemitashumitannuepipuna e uitakanit, mashinatautishutau ashit anitshenat peiku ka mamuiht eshinakuannit tshetshi nikan tshituteht,e shutshiteieht mak tiapuetatishuht. Uepishtikueiau-assi ka uauitshiaushit, eukuan ka tapuetatishunanut anite CAQ. 3 uashtessiu-pishimu, eukuan tshe utitshipanit tshetshi mishkutshipanit.

Ungava

Abitibi-Est

Roberval

Saint-Laurent

Nicolet-Bécancour

Duplessis

« Tan ua ishinniuiaku, tanite ua utshipaniaku, kassinu peikutau tshekuan tshui apashtananu. Anu tshetshi minuat inniun anutshish ume kashikat, mak anite aishkat tshetshi minupanit nikan e aitapinanut. Anitshenat ka tshimataht tshinanu eshinniuiaku, mak anitshenat pietashtamiteht kuessipannuau tshe pimuteht, nipakusheniten Uepishtikueia-assi tshetshi mitshet atusseuna unuipanitat. Eukuan ne uet mashitsheian. Eukuannu anitshenat mamu ka taiat ua uauitshiaushiat uet ute taht ».

« Apu uesha natshishk tshika ut taiat anite anitshenat ka tshimanakaniht nanitam peikutau ka taht mak anitshenat tshishe-utshimat ka taht shashish ka pet ishi-tshishkutamuakaniht. Anitshenat eka ka apatenitahk katshishkutamatunannut. Anitshenat ka itenitahk auen ushtikuanit ka itakushit, miam anitshenat ka auassikashuht. Anitshenat eka tshekuannu ka tutahk uiapatahk ishpish uinakutakannit assinu. Tshika ui teuat ussi-aianishkat tshishe-utshimau-aitunnu tshetshi tshitapatahk tshetshi tshimanakaniht.

Uepishtikueiau ka uitshiaushit ui tshimatau Uepishtikueiau-assinu e shissinetaiat Ushkat Innua ute taniti ka apiniti ute umenu assinu.

Tshishe-utshimau ka uitshiaushit uitamu tshe tshimatat ushkat tekuannit tshetshi uauetashuapatakannit anitshenat e nishuht eshinniuht Uepishtikueiau-tshishe-utshimaua mak innua ne e uitakanit ua pitshitshipanitakanit tshetshi kanuenitakanit mak natuapatakanit eshi-takuak tshekuan assit.

Ninan uin, tshetshi kapeiku-tipenimitishuht innuat, ushkat tshekuan eshtakanit eukuan Ushkat Innuat ute ka that utinnu-utaimunnuau mak Aissimeuat, mak tshetshi eka nashpit takuak kamatshi-tshitapamakanit auen anite ka aitutuakanniti innuat akushun e uitakanit mak anite uauitshitunit, anitshenat anu e uinakanniti ishkueuat mak auassat.

Tuiet tshitshipanipanniti utatussuen, Uepishtikueiau ka uauitshiaushit shaputue tshika atusseu tshetshi ut takuak kuishkuatishiun ne e tshitapatakanit innu-auassat ka uniakaniht kie ma ka nikuashkatakaniht anite ne katshishkutamatsheushuap ka kanuenimakaniht auassat.

Tiapuetakanit mak uiauitshiaushinanut ashit nenua innu-assia kiatshitaikanniti, nika issishuenan tshetshi nanatuapatitshenanut anite nenua tshiashi-katshishkutamatsheutshuapa anite ka kanuenimakaniht auassat mak tshetshi uemut takuak kananatu-tshissenitakanit auen tan ka itashpinet. Pessish nika tanan anitshenat uikanishimauat ua nashakushitaui tshetshi ut tutakanit, tshetshi ut eka nita uni-tshissitutakanit ne ka ishpanit, tshetshi ut nanitam tshissitutuaht uikanishuaua anite ka nipiniti.

Tshetshi tshitimauenimakaniht auassat ka uniakaniht, anite ka ututeht auenitshenat eshku enniuht kashikanit anite ka taht katshishkutamatsheutshuapit ka kanuenimakanniti auassa, uikanishuaua mak utinnimuaua mak tshetshi takuak tshitshue katapuemakak kau kaminu-uitsheutunanut anitshenat tatipan ka ishinniuht, Uepishtikueiau ka uauitshiaushit tutamu tshetshi nenu 30 ushkau-pishimua tshishtauakanniti, tshishiku tapueun ka takuak mak kau kaminu-uitsheutunanut, tshetshi minashtakaniushtet ne tshishiku kassinu Uepishtikueiaunnuat, ishkueuat kie napeuat.

Shash utitshipanu tshetshi nishtuapatakanit tekuak kamatshi-tshitapamakanit auen anite atusseutshuapa, uesh ekute tekuannit Innuat ute ushkat ka taht mak Aissimeuat etuteht. Ushkat tshekuan tshipa ui tutakanu tshetshi utinakanit ne « principe de Joyce.

Uepishtikueiau ka uauitshiaushit eukuan ne ushkat eshtat uashka assinu e uitakannit. Atusseun ua tutamat, eukuan Uepishtikueiau utatusseun kiatshitaitshemakanniti assia anu ka ut shepekuti ute eshpitashkamikat.

Shash ume 2022 tshititananu. Eukuan ne muku etat tshetshi uitshiakanit, tshetshi apatenitakanit mak shutshiteieshkatun tshetshi takuak. Nenua ishi-katshitaitshemakana e aunakaniht auenitshenat utenat kie ma anite eshi-tipenitamamukaki assia, tshetshi nakatuenitakanit minashkuau utenaua mak utenassa, anite tekuak e minuat inniun.

Ume anutshish eshpishipanit inniun, itenitakuan ne Uepishtikueiau tshetshi eka utitaik nenu ka ishi-pakushenitak tshetshi nakaik ishpish amatshuapannit eshpishikateniti ishpish mishkutshipannit. Ne CAQ apu muku nene pataik ka ui aitit, tshitutakunanu tshe ashateuaku petshitinak eshi-natuenitamakut kauenutishininiti atusseutshuapa eka ka minuanit tshekuannu uenuipanitaniti.

Uepishtikueiau ka uauitshiaushit natuenitamu tshetshi uauetashtakanniti atshitashuna, ua utitaik kie tshetshi kanieupannit tshetshi ut Uepishtikueiau tashtuait ishi-tat nenu kashtekannu e uitakannit nete tshe ishpish papannanut 2050. Ne tshe ishi-atusseiat, ekute tshe ut tshi mishue Uepishtikueiau-assit tshinikuanashkamat, eka e kanuenitamat utapan. Nika nakatuenitenan assia ka minunakutakanniti, tshinipiminua mak minashkuau, eka peiku tshishe-utshimau nenu ut tutak ute Uepishtikueiau-assi utipatshimunnit.

Mashinatautishuku anite Uepishtikueiaiu ka uauitshiaushit, eukuan ka naushunakanit tshetshi ishpitenitakanit uashka assi

Auen anite tshe apit eka e mishta-tshishikashut mak tshe minuenimut, namaieu an tshetshi mishta-uenutishimakak. Uepishtikueiau ka uauitshiaushit eukuan uin muku ka natashtat tshetshi eka shuniaunit mak pekutat tshetshi uauetashtat ianimaunannut tshetshi mishkakannit anite tshe apinannut.

Ashit tshishe-utshimau ka uauitshiaushit, ueshkat ka mishta-shuniaut anite tshe apinanut, utat tshika takuan. Tshetshi nakatuenitakanit eshpapanit anite kaipinanut, tshika uitshikuht anitshenat anite tshe apiht tshetshi eka ishpish tshishikashuht uiesh 850$ peikupipuna.

Kie, ne tshishe-utshimau ka uauitshiaushit issishueu tshe tshimatat tatutshishemitashumitannu anite tshe apinanukau mamu e ussinakuaki mak tshe eka mishta-shuniaunakau. Nenua mitshuapa tshika uitshikuht anitshenat tatutshishemitashumitannu kautishkuemiht mishue ute Uepishtikueiau-assit. E minu-tshitapanitakanit, Uepishtikueiau ka uauitshiaushit tshika tshimatau 50 000 anite tshe apinanukau kie tshetshi eka ishpish tshishikashuniti innua anite ka taniti utenat kie ma innu-assit.

Auen tshetshi tipenitak mitshuapinu kassinu nenu ishi-pakushenitamuat anitshenat mitshet kautishkuemiht. Uepishtikueiau ka uauitshiaushit tshika aiau mitshuapa, tshetshi atauatshet eka e mishta-natuenitak mak tshetshi eka uaueshi-tipi-atshitakanit.

Shash nishunnuepipuna (20) anu, nanitam tshitikunan tshetshi atshunakanit e ashuapatakanit anite akushiutshuapit mak tshetshi minakanit kassinu auen tshetshi kanuenimat unatukunishima tshe aitutakut. Eshinakuak anutshish : apu ishpish tshi aitutuakanit auen. Tshishe-utshimau Legault iapit eukuan kie uin issishuepan tshetshi taniti auen unatukunishima mak ne Uepishtikueiau iapit eukuan eshi-animaut. Mak at tshetshi tshipaikannit nenu meshta-mishanit auen umitshi, anu nui tutenan eshinakuak tshetshi tutakanit, tshetshi mishue natukuiakanit.

Anite nika ashtanan tshetshi aitutuakanit auen CLSC, tshe shenakanit 24 tatutipaikana, 7 tatutshishikua. Apu tshika ut takuak ne ka ashuapatakanit ushtikuan auen ka itakushit, uesh iapit ne auen ushtikuan, tshikamu anite auen uiannit.

Anu nika ashtanan tshetshi akua tutuakanit auen, eka nashpit ne takuak anite minuinniunit. Uesh eka natukutakanit tshekuan, anu minuau tshetshi natukutakanit akushun.

Tsheshenniut auen uitshit ishpitenitamunit, etaniti uikanisha uashka, kassinu nenu auen tshipa ui ishinakushu. Eshi-meshtinakanit anite auen e aitiutuakanit uitshuat, anu nashiku patetat tatuau mak nenua assia Pays-Bas kie ma ne Danemark. Uepishtikueiau ka uauitshiaushit anu nishuau takut tshishennua tshika aitutuakanuat anite uitshuauat, tshetshi ishinakuak tshishennu uitshit eukuan ne tshipa ui ishinakuan, mauat uin upime ka aitutuakanit auen.

Ishpish pet mishkutshiht tshishe-utshimauat shash mitshetatupipuna, kassinu issishueuat tshetshi katshishkutamatunannut ashtaht ushkat, muku apu peiku ut tshi tutak tshetshi mishue auen itutet anite e minuaniti katshishkutamatunannut.

Tshishe-utshimau ka uauitshiaushit shaputue tshika itshenamu nenua ka tshishikashunanukau tshishkutamatsheu-aitapashtauna anite katananut katshishkutamatsheutshuapa, kaiapishissishiht mak anite kamamishishtiht, iapit ne e uitakanit mishue tshishkutamatsheun kaishpitishiht mak ne tshishkutamatsheun-atusseun. Nitshimatanan kie mishue tshe ishi-pimutenanut auen tshetshi tutak atusseunnu ka ishi-tshishkutamuakanit mak shash nitatshunenan ne tshipa ishpish tshishikashunanu anite tshishkutamatsheunit katshi takuak kamamishishtih, tshetshi ut minu-utitaikanit tshe eka tshishikashunanut.

Tshetshi minuat anite tshe tshishkutamatshenanut, Uepishtikueiau ka uauitshiaushit tshika tutamu tshetshi takuannit anite tshe taniti auennua ka minu-nishtuapataminiti atusseunnu mak tshetshi uaueshtakanit, mishaikanit, kashipekut mak tshetshi tshimatakanit tshetshi ut minuati katshishkutamatsheutshuapa nenu ua apashtaht katshishkutamuakanishiht mak kupanieshat anite eshi-taht katshishkutamatsheutshuapit.

Tshetshi anitshenat pietashtamiteht minu-katshitinahk Innua utipatshimunnua, Uepishtikueiau ka uauitshiaushit ui ishinakutau tshishkutamatsheunnu anitshenat ut innuat eshinniuht anutshish, ne anutshish tipatshimun e uitakanit, ishpish kauapishit ute tat mak eshpanit anutshish inniun.

Anite Uepishtikueiau ka uauitshiaushit, tshui uitshitinan ne ishpish ishipapanit inniun. Eukuan uet mamunitshiht ka shukatenitakushiht ka tshimanitshiht ne pakassiun e uitakanit, uetshenat etaht Haroun Bouazzi, pitu-katipenitak anite shuniautshuapit anite e taht Tshishe-utshimauat, Mathieu Dufour mak Simon Tremblay Pepin, shunianu ka tshitapatahk mak katshishkutamatsheht, Alejandra Zaga Mendez, kaminu-nishtuapatak eshi-pimipannit shunianu mak Christine Gilbert, katshishkumatshet anite Kamishta-tshishkutamatunannut Laval, CPA, kuenuenitak MBA eshi-uitakannit, mak ue kaminu-nishtuaptak eshi-mashinaitshenannut ute Uepishtikueiau-assit.

Anite etashiat minu-uitakanipan : nui uauetashtanan tshetshi eka ishpish animauht shuniat uikanishimauat, kaiuassiuht mak tshishennuat ishkueuat kie napeuat. Tshishe-utshimau ka uauitshiaushit uitamu uashtenamakana tshe punipannit e amatshuepannit. Iapit nika atushkatenan nenua katshishkutamatsheu-aitapashtauna ishpish mishta-amatshuepanniti, iapit nika ashtanan tshetshi auen uitshikut uipita aitutakanniti mak nashiku tshetshi tshishikashunanut ka aunakaniht auenitshenat.

Minuat, nika itshenenan netakassa uenapissish miam mitshimit, e aitutatishut auen uiat, natukuna mak matshunia tshe ishpish takuak ne e amatshuapanit inniun. Mashten, e tshinipinanut tshika ui ishpapanitakanu kanieun 18$/peikutatutipaikana tshetshi ut uitshikuht kaiuassiuht mak uikanishimauat eka ka ishpish mishaniti ukanieunnuau. Iapit tshishennuat tshipa ui uitshiakanuat shuniat, anitshenat ka katshitaukuht ka ishpapannit inniunnu.

Uepishtikueiau ui uapatamu tshetshi mishta-mishkutshipannit. Ait tshetshi ishinakuannit tshishe-utshimau-aitunnu. Anite Uepishtikueiau ka uauitshiaushit, eshi-natshinakauiat tshetshi tipan tipenimitishuiat, namaieu ne kueshtitshit ne kutak kie ma kueshtamat tshetshi eka taiat, muku tshetshi takuak ussi-atusseun anite mamu katananut, tshetshi tshimakanit assi kassinu auen tshe apashtat. Tshetshi shutshishit ne tipan eshinniut mak tshetshi ashinet e tshi minu-utinat kutaka eshinniuniti.

Tshetshi minitishuiaku assi, eukuan patush tshe tshi mishkutunamaku eshinniunanut anite mamu katananut. Tshetshi mishkutshipanit ute eshpitashkamikat, ekute ute tshetshipanit Uepishtikueiau-assit. Nui tshishpeuatenan uashka assi mak tshetshi mamu taiat ashit nenua ka shipekuti assia ute eshpitashkamikat, muku tshishakuikunanu pimi-pakassiun ute Kanata-assit. Nipakushenitenan tshetshi minu-tipenitakanit pakassiun tshe uitshikauiaku anite tshitinniunnat, muku apu tshitshue katshitshipatamaku. Tshinanu tshui tshitapatenanu tshe ishpaniaku mak tshetshi minu-aimituiaku tatipan eshinniuiaku ashit anitshenat innuat, muku takuana eka e kuishkushinakuaki takuaimatsheuna e takuaimakauiaku mak eka tshi ishpish tshi kataku ituteiaku.

Tshitshue eka ka makupishut auen, eukuan tshetshi mamu naushunamaku tshinanu tshekuan ua apashtaiaku. Tshekuan tshe uitshikuiaku eukuan tshetshi tshimataiaku Uepishtikueiau-assi.

Ruth Messier Agente officielle

QUÉBEC SOLIDAIRE 2022