ᒫᓍᐦ ᒫᓰ ᑲᔦᐦ ᑫᐃᐸᕃᓪ ᓈᑑ-ᑎᐳᐙᐦ ᒌ ᒋᐦᒋᑳᐴᐦᑖᐅᒡ ᒉ ᒌ ᒥᔪᐐᒋᐅᑐᓈᓅᔨᐦᒡ ᐊᓂᑌᐦ ᐄᔑ ᐋᐸᑎᓰᓈᐦᒡ ᔖᔥ ᓀᐅᐱᐳᓐᐦ ᐊᓂᑌᐦ ᐅᑖᐦᒡ᙮ ᐊᓂᒌ ᔂᓕᑌᕐ ᑳ ᒫᒨᐋᐸᑎᓰᔥᑕᐦᒀᐤ ᒌ ᐙᐸᑎᔨᐌᐅᒡ ᐁᐅᒄ ᐊᓐ ᒥᒄ ᐁ ᐯᔭᑯᐎᒡ ᒉ ᒌ ᐐᒋᐋᐸᑎᓰᒫᐧᑖᐤ ᕙᕌᓐᓯᐅᐙᐦ ᓕᒀᐅ ᑲᔦᐦ ᐊᓐ ᐁ ᐄᔑ ᐱᒥᐸᔨᐦᑖᑲᓄᐎᒡ ᔮᐃᑌᐦ ᒥᓯᐌ ᐊᐌᓐ ᐅᑦᐦ ᑯᐯᒃ ᑲᑕ ᐐ ᑲᓇᐙᐸᒫᑲᓅ ᒉ ᒌ ᒥᔪᐸᔨᐦᐄᑯᑦ᙮

ᒉ ᒌ ᐐᔦᔨᐦᑕᑲᓄᐎᒡ ᑖᓂᑌᐦ ᒉ ᒌ ᐋᐸᑎᓰᔥᑕᑲᓄᐎᒡ ᐁ ᒫᔥᑖᓄᐎᒡ ᐊᓐ ᐁ ᑴᔅᒋᐸᔨᐦᒡ ᐁ ᐃᑌᔨᐦᑖᑯᒡ ᐊᔅᒌ ᑲᔦᐦ ᒌᔑᒄ᙮

ᒉ ᒌ ᓈᑕᒧᐙᑲᓅᐧᑖᐤ ᐸᐯᔭᑯᑌᓅ ᐊᓂᔫᐦ ᒉᒀᔫᐦ ᐁ ᐄᔑ ᔭᐦᒋᐸᔨᔨᐦᒡ ᐁ ᐃᑕᐦᑐᑖᑯᓂᔨᐦᒡ ᐁ ᐄᔑ ᐱᒫᑎᔔᐙᒉᐧᑖᐤ᙮

ᒉ ᒌ ᒥᔅᑲᒥᒄ ᑖᓂᑌᐦ ᒉ ᒌ ᐄᔑᑳᐴᔥᑕᒥᒄ ᐊᓂᔫᐦ ᐙᔅᑳᐦᐄᑲᓐᐦ ᐁ ᓅᐦᑌᐸᔨᐧᑳᐤᐦ ᑲᔦᐦ ᒉ ᐅᔑᐦᑖᑲᓄᑳᐤ ᐙᔅᑳᐦᐄᑲᓐᐦ ᐐ ᐊᐌᓐ ᒋᐦᒋᐌ ᐁ ᑎᐱᔨᐌᐅᓰᑦ ᐊᓂᑌᐦ ᐄᔑ ᓃᔥᑖᒥᐦᒡ᙮

ᒦᓐ ᒉ ᒌ ᐅᔅᒋᒋᐦᑖᑲᓄᐎᒡ ᐊᓐ ᒥᔪᐱᒫᑎᓯᐎᓐ ᐁ ᐱᒥᐸᔨᐦᑖᑲᓄᐎᒡ ᐊᓐ ᐁ ᐄᔑ ᓅᓱᓀᐦᐊᑲᓄᐎᒡ ᐁ ᐃᔮᒀᒦᓈᓄᐎᒡ ᑆᒧᔥ ᐁ ᐃᔮᐦᒀᒋᐸᔨᒡ ᒉᒀᓐ ᑲᔦᐦ ᐊᓂᑌᐦ ᐃᐦᑖᐎᓂᐦᒡ ᐁ ᐄᔑ ᓅᓱᓀᐦᐊᑲᓄᐎᒡ ᑲᓇᐌᔨᒧᐌᐎᓐ᙮

ᒉ ᒌ ᐐᒋᐋᐸᑎᓰᒫᑲᓄᑖᐤ ᓇᓈᐦᑰ ᐁᑎ ᐃᑎᔅᑳᓀᓯᑖᐤ ᐃᔨᔫᒡ ᒥᓯᐌ ᒉ ᒌ ᒫᒨᓰᔨᐦᒄ ᐆᑦᐦ ᑳᓇᑖ᙮

ᓅᑯᓂᔫ ᐁ ᑴᔅᒉᔨᐦᑕᒃ ᑯᐯᒃ᙮ ᒉ ᒌ ᐄᔑ ᔮᐦᒌᔥᑖᒥᒄ ᐊᓂᔫᐦ ᒉᒀᔫᐦ ᐁ ᐄᔑ ᓇᒋᐸᔨᐦᐄᑯᔨᐦᒄ ᐆ ᓃᔥᑎᓅᐯᔭᒄ ᐊᔅᒌᐅᒋᔅᑖᓱᐎᓐ ᐁᑎ ᐲᐦᒉᔨᐦᒄ, ᐋᔥᑐᓀᓯᓂᐦᐙᑖᐌᓂᒡ ᐊᓂᒌ ᐊᐌᓂᒌ ᑳ ᓲᐦᒋᑳᐴᔥᑕᐦᐧᑳᐤ ᑲᔦᐦ ᐊᓂᒌ ᑳ ᓀᑳᓰᐧᑖᐤ᙮ ᑯᐯᒃ ᔂᓕᑌᕐ ᐁᐅᑯᓂᒡ ᒋᐦᒋᐌ ᐐᒉᐦᑕᐧᑳᐤ ᐊᓂᔫ ᒀᓕᓰᐙᓐ ᐋᕕᓃᕐ ᑯᐯᒃ CAQ ᑳ ᒫᒨᐱᔥᑕᒥᔨᐦᒡ᙮ ᐆ ᐐᔖᑯᐲᓯᒻ 3, ᐁᑯᑦᐦ ᒉ ᐸᐦᒋᔅᑎᓂᒥᒄ ᐆ ᒉ ᐄᔑ ᐐᒋᑳᐳᔥᑕᒥᒄ᙮

ᑯᑣᔥᒡ ᐃᑕᔓᐎᒡ ᐊᓂᒌ ᐄᓈᐦᒡ ᐁᑎ ᐃᑎᔅᑳᓀᓯᐧᑖᐤ ᒉ ᐎᔦᔨᒫᑲᓅᐧᑖᐤ ᐋᔥᑐᓀᔥᑖᑲᓅᑌᐦ, ᑯᐯᒃ ᔂᓕᑌᕐ ᐐ ᐎᔦᔨᐦᒣᐤ ᐄᓅᐎᑦ ᑲᔦᐦ ᐄᔨᔫ/ᐄᓅ ᐁ ᐃᑎᔅᑳᓀᓯᔨᒡ ᐊᐌᔫᐦ ᒉ ᒌ ᐊᐱᔨᑦ ᐊᓂᑦᐦ ᓈᔑᓂᓪ ᐋᓭᐱᓖ - ᑳᓇᑖ ᐄᔨᔫ ᐁᑎ ᐃᑎᔅᑳᓀᓯᐧᑖᐤ ᐁ ᒫᒨᐱᐧᑖᐤ᙮ ᐆ ᐁ ᒫᒨᐱᓈᓄᐎᑦ ᓈᔥᑖᐺ ᒥᐦᒋᑐᐎᒡ ᐊᐌᓂᒌ ᒥᓯᐦᑌᔅᑲᒥᒄ ᐆᑦᐦ ᑯᐯᒃ ᓇᓈᐦᑰ ᐄᔨᔫ ᐁᑎ ᐃᑎᔅᑳᓀᓯᒥᐧᑳᐤ ᐃᐦᑖᐎᓐᐦ᙮ ᒫᐅᒌ ᒫᒃ ᑳ ᐐᐦᐋᑲᓅᐧᑖᐤ ᒉ ᒌ ᓈᑎᐦᐧᑳᐤ ᐆᔫ ᐋᐸᑎᓯᐎᓂᔫ ᒣᐃᑎᐋ ᓛᑉᕆᒃ-ᓵᑲᓈᔥ ᐊᓂᑌᐦ ᐊᓐᑳᕚ, ᐯᓐᒐᒥᓐ ᔒᓐᑲᕌ ᐊᓂᑌᐦ ᐋᐱᑎᐲ-ᓇᑲᐯᐦᐊᓂᐦᒡ, ᒫᐃᑲᓪ ᐅᑦᕌᐃᔅ ᐊᓂᑌᐦ ᕎᐱᕐᕚᓪ, ᔒᕌᕐᑦ ᐸᕌᐃᓐᑦ ᐊᓂᑌᐦ ᓰᐃᓂᑦ-ᓨᕆᓐᑦ, ᔖᒃ ᕞᐃᕆᐙᓪ-ᐙᑦᓲ ᐊᓂᑌᐦ ᓂᑯᓓᑦ-ᐯᐃᑳᓂᑰᕐ ᑲᔦᐦ ᐙᐱᑯᓐ ᒣᔅᑐᑯᔔ ᐊᓂᑌᐦ ᒸᕇᔅ-ᕇᔖᕐᑦ᙮

“ᒥᒄ ᐊᐌᓐ ᐁ ᐃᔑᓈᑯᓯᓯᔨᒄ, ᒥᒄ ᑖᓂᑌᐦ ᐁ ᐅᑎᐦᑌᔨᐦᒄ, ᐯᔭᑯᓂᒡ ᒉᒀᓐ ᒋᓂᑐᐌᔨᐦᑌᓈᓅ: ᒉ ᒌ ᒥᔪᐸᔨᔨᐦᒄ ᐁ ᐱᒫᑎᓰᔨᐦᒄ ᐊᓅᐦᒡ ᑲᔦᐦ ᒉ ᒌ ᒥᔪᐸᔨᔨᐦᒄ ᐊᓂᑌᐦ ᐄᔑ ᓃᔥᑕᒥᐦᒡ᙮ ᐊᓂᒌ ᐊᐌᓂᒌ ᑳ ᐐᒋᐦᑖᐧᑖᐤ ᐆᑦᐦ ᐁᑎ ᐃᐦᑖᔨᐦᒄ ᐊᔅᒌᐦᒡ ᑲᔦᐦ ᐊᓂᒌ ᒉ ᑕᐦᑯᓂᒀᐤ ᐊᓂᔫ ᐋᐸᑎᓰᐎᓂᔫ: ᑖᐺ ᒋᓂᑐᐌᔨᐦᑖᑯᓯᓇᐙᐤ ᒉ ᒌ ᐃᐦᑕᑯᒡ ᒋᐦᒋᐌ ᐋᐸᑎᓰᐎᓐ ᒥᓯᐌ ᐊᐌᓐ ᐁ ᐄᔑ ᐋᐸᑎᓰᔥᑕᒧᐙᑲᓄᐎᒡ᙮ ᐁᐅᒄ ᒫᒃ ᐌᐦᒋ ᒫᔥᑖᔮᓐ᙮ ᐁᐅᒄ ᐌᐦᒋ ᐃᐦᑖᑦ ᐆ ᔂᓕᑌᕐ ᐁ ᒫᒨᑳᐴᔮᐦᒡ᙮”

“ᓇᒧᐃ ᒋᑲ ᓇᓀᐦᑳᒋᐸᔨᓈᓅ ᐊᓂᒌ ᐅᐦᒋ ᐁ ᓂᑳᔑᒥᑯᔨᐦᒄ ᔖᔥ ᐌᔥᑲᒡ ᑳ ᐯᒋ ᐃᐦᑖᐧᑖᐤ ᐁᔥᒄ ᐯᔭᑯᓂᒡ ᐁ ᐄᔑ ᑲᓇᐙᐸᐦᑕᐧᑳᐤ ᒉᒀᔫᐦ ᐊᓂᑌᐦ ᐯᒋ ᐅᑖᐦᒡ᙮ ᐊᓂᒌ ᐁᑳ ᐋᐸᑌᔨᐦᑕᒥᐦᐄᑯᐧᑖᐤ ᒋᔅᑯᑕᒫᒉᐎᓂᔫ᙮ ᐊᓂᒌ ᑳ ᐃᑌᔨᐦᑕᐧᑳᐤ ᒫᒥᑐᓀᔨᐦᑕᒧᐎᓐ ᒥᔪᑲᓇᐌᔨᒧᐌᐎᓐ ᒥᒄ ᐊᓂᒌ ᒬᐦᒡ ᐊᐙᔥ ᐁ ᔖᑯᓀᑦ ᐁ ᑲᓇᐌᔨᒥᑯᒡ᙮ ᐊᓂᒌ ᐁᑳ ᐋᐸᑌᔨᐦᒫᑣᐤ ᐊᓂᔫᐦ ᐊᐌᔫ ᒥᔥᑕᐦᐄ ᑳ ᐗᓈᒋᐦᑖᔨᐦᒡ ᐊᔅᒌᔫ᙮ ᔖᔥ ᐅᒋᐦᒋᐸᔨᔫ ᒉ ᑴᔅᒋᓇᒥᒄ ᐊᓐ ᐁ ᐱᒥᐸᔨᐦᑖᑲᓄᐎᒡ ᐐᔓᐌᓯᓈᐦᒡ ᐁ ᑎᐯᔨᐦᑖᑯᓯᔨᐦᒄ᙮

ᑯᐯᒃ ᔂᓕᑌᕐ ᐐ ᐐᒋᐋᐸᑎᓰᒣᐤ ᒥᓯᐌ ᐄᔨᔫᐦ/ᐄᓅᐦ ᑲᔦᐦ ᐄᓄᐎᑦᐦ ᐆᑦᐦ ᐊᔅᒌᐦᒡ ᐁᑎᑑ ᒉ ᒌ ᒥᔪᓈᑯᐦᒡ ᑯᐯᒃ ᐊᓂᑌᐦ ᐄᔑ ᓃᔥᑖᒥᐦᒡ᙮

ᒋᑲ ᐱᒥᐸᔨᐦᑖᓅ ᒥᓯᐌ ᐁᑎ ᐃᑎᔅᑳᓀᓯᔨᐦᒄ ᐁ ᐐᒋᐋᐸᑎᓰᒥᑐᔨᐦᒃ ᑯᐯᒃ ᒋᔐᐅᒋᒫᐎᓐ ᑲᔦᐦ ᐄᔨᔫᐦ/ᐄᓅᐦ ᑲᔦᐦ ᐄᓄᐎᑦᐦ ᒥᓯᐌ ᒉᒀᓐ ᐁᑎ ᐃᑖᐸᒋᐦᐆᔨᐦᒄ ᐊᓂᑌᐦ ᐊᔅᒌᐦᒡ ᐁ ᐆᐦᒋᐸᔨᒡ, ᒋᓀᐅᔥ ᒉ ᒌ ᑲᓇᐌᔨᐦᑖᑯᒡ ᑲᔦᐦ ᒉ ᒌ ᐋᐸᒋᐦᑖᔨᐦᒄ᙮

ᑯᐯᒃ ᔂᓕᑌᑦ ᑖᐺᒉᔨᐦᑕᒻ ᐊᓂᔫ ᐄᔨᔫᐦ/ᐄᓅᐦ ᐅᑲᔅᒋᐦᐆᐎᓂᔫᐦ ᐁ ᐐ ᐱᒥᐸᔨᐦᐄᓱᔨᐦᒡ ᐁ ᐐ ᒌᐦᑳᔮᐸᐦᑕᒧᐙᒡ ᐅᑎᔨᒧᐎᓂᔫ ᑲᔦᐦ ᐁᑎᑑ ᒉ ᒌ ᐐᒋᐦᐋᑦ ᐊᓂᑌᐦ ᐄᔑ ᑖᐱᑑᓯᐎᓂᐦᒡ ᑲᔦᐦ ᐁᑳ ᒉ ᒌ ᓂᑳᔑᓂᔨᐦᒡ ᐁ ᓇᓂᑐᐌᔨᐦᑕᒥᔨᐦᒡ ᒥᔪᐱᒫᑎᓯᐎᓂᔫ ᑲᔦᐦ ᐐᒋᐦᐄᑯᓯᐎᓂᔫ, ᐊᔅᐯ ᐊᓂᒌ ᐃᔅᑴᐅᒡ ᑲᔦᐦ ᐊᐙᔑᔕᒡ᙮

ᐊᓐ ᒥᓂᑯᔥ ᐲᐦᑌᐸᔨᔮᐦᑌ ᐊᓂᑌᐦ ᐄᔑ ᒪᓯᓇᐦᐄᒉᐅᑲᒥᑯᐦᒡ, ᑯᐯᒃ ᔂᓕᑌᕐ ᒥᓯᐌ ᐁ ᐃᔥᐱᔥ ᒪᔥᑯᓯᐎᓂᐦᒡ ᒋᑲ ᐃᐦᑑᑕᒻ ᒉ ᒌ ᐐᒋᐦᑖᑦ ᐊᓂᑌᐦ ᐄᔑ ᑎᐹᔅᑯᓂᒉᐎᓂᐦᒡ ᐁ ᓈᑕᒧᐗᑦ ᐊᓂᔫᐦ ᐊᐙᔑᔖᐦ ᐁᑳ ᐐᔅᑳᑦ ᐅᐦᒋ ᒋᐌᔨᐦᒡ ᓀᔥᑦ ᑳ ᓂᐦᐋᐐᑯᐙᑲᓄᔨᐦᒡ ᐊᓂᑌᐦ ᒋᔅᑯᑕᒫᒉᐅᑲᒥᒄ ᑳ ᐅᑎᓈᐧᑖᐤ ᐊᐙᔑᔖᐦ᙮

ᓂᔅᑲᒨᑣᐌᓂᒡ ᐊᐌᓂᒌ, ᓂᑲ ᐋᐸᑎᓰᔥᑌᓈᓐ ᒉ ᒌ ᐄᔑ ᐐᒋᐦᑖᔮᐦᒡ ᐊᓂᔫᐦ ᐃᐦᑖᐎᓐᐦ ᒉ ᒌ ᒨᓂᐦᐄᒑᓅᐎᐦᒡ ᐊᓂᑌᐦ ᐌᔥᑲᒡ ᑳ ᒋᒥᑌᐧᑳᐤᐦ ᐊᓂᔫᐦ ᒋᔅᑯᑕᒫᒉᐅᑲᒥᒄᐦ ᑲᔦᐦ ᒉ ᒌ ᓈᓂᑑᒋᔅᒉᔨᐦᑕᑲᓅᐎᐦᒡ ᑖᓐ ᑳ ᐄᑖᐱᓂᑖᑲᓅᐧᑖᐤ ᐊᓂᒌ ᐊᐙᔑᔕᒡ᙮ ᓂᑲ ᐐᒋᐦᐋᓈᓂᒡ ᐊᓂᒌ ᐸᐯᔭᑯᑌᓅ ᒉ ᒌ ᐄᔑ ᐱᒥᐸᔨᐦᑖᐧᑖᐤ ᐊᓂᔫᐦ ᐁ ᒫᒨᓰᐧᑖᐤ ᑲᔦᐦ ᐁ ᒋᔅᒋᔨᐦᑐᐙᑖᐤ ᐊᓂᔫᐦ ᐅᓵᒋᐦᐋᑲᓂᐙᐤᐦ ᑳ ᐗᓇᒋᐦᐋᑲᓅᔨᐦᒡ ᑲᔦᐦ ᑳ ᐗᓈᐦᐧᑖᐤ ᐊᓂᑌᐦ ᐄᔑ ᓂᐴᐎᓂᐦᒡ᙮

ᑯᐯᒃ ᔂᓕᑌᕐ ᒋᑲ ᒌᐦᑳᔮᐸᐦᑕᒻ ᐊᓐ ᐌᐦᐌᐅᐲᓯᒻ 30, ᐊᓐ ᐁ ᒌᔑᑳᐦᒡ ᑖᐺᐅᓰᐎᓂᐦᒡ ᑲᔦᐦ ᐄᔑ ᐆᑑᑌᒧᐌᐎᓂᐦᒡ, ᒉ ᒌ ᐅᔑᐦᑖᑲᓅᐎᒡ ᐁ ᐄᐌᔑᓈᓄᐎᒡ ᐊᓐ ᐁ ᒌᔑᑳᐦᒡ ᐁ ᒋᔅᒋᔨᐦᑐᐙᑲᓅᐧᑖᐤ ᐊᓂᒌ ᐊᐙᔑᔕᒡ ᐁᑳ ᐐᔅᑳᑦ ᐅᐦᒋ ᒋᐌᐧᑖᐤ, ᐊᓂᒌ ᒋᔅᑯᑕᒧᐙᑲᓇᒡ ᑳ ᐱᒫᒋᐦᐆᐧᑖᐤ, ᑲᔦᐦ ᐊᓂᔫᐦ ᐸᐯᔭᑯᑌᓅ ᑲᔦᐦ ᐆᑎᔨᐦᑕᐎᓇᐙᐤᐦ ᑲᔦᐦ ᐁ ᒣᔅᑲᓈᒉᓄᐎᒡ ᒋᐦᒋᐌ ᒉ ᒌ ᐄᔑ ᐐᒋᐅᑐᓈᓄᐎᒡ ᐊᓂᑌᐦ ᐄᔑ ᐅᑑᑌᒧᐌᐎᓂᐦᒡ᙮

ᔖᔥ ᐅᑎᐦᒋᐸᔫ ᒉ ᒌ ᐯᐦᑖᑲᓅᐎᒡ ᐁ ᔮᐃᒋᐦᑌᑦ ᐁ ᒫᔥᑖᑲᓄᐎᒡ ᐊᓐ ᐁ ᐆᐦᑳᑌᔨᒫᑲᓅᑖᐤ ᐄᔨᔫ/ᐄᓅ ᑲᔦᐦ ᐄᓄᐎᑦ ᐁᑎ ᐃᑎᔅᑳᓀᓯᑖᐤ᙮ ᐁᐅᒄ ᐆ ᐯᔭᒄ ᒉ ᐯᐦᑐᐙᑖᑦ “ᒞᐃᔅ ᐱᕆᓐᓯᐱᓪ᙮”

ᔖᔥ 2022 ᐃᑕᔥᑌᐤ ᐊᔅᒌᐅᒋᔅᑖᓱᐎᓐ᙮ ᐊᓂᑌᐦ ᐄᔑ ᓲᐦᒉᔨᒧᐌᐎᓂᐦᒡ ᑲᔦᐦ ᓀᑳᓰᐎᓂᐦᒡ ᒋᑲ ᐄᔑ ᐃᑐᐦᑌᓅ᙮ ᐅᑖᐹᓐᐦ ᑳ ᒫᒨᐴᓯᓈᓅᐎᑦ ᒋᑲ ᐋᐸᑎᓐᐦ ᐊᓂᑌᐦ ᐃᐦᑖᐎᓂᐦᒡ ᑲᔦᐦ ᐊᓂᑌᐦ ᐐᑕᒣ ᐃᐦᑖᐎᓂᐦᒡ, ᐊᔅᒌ ᐅᐦᒋ ᐁ ᐐ ᒥᔪᑲᓇᐌᔨᐦᑕᑲᓄᐎᒡ ᑲᔦᐦ ᓇᓈᐦᑰ ᐁᑎ ᐃᔥᐱᔖᐧᑳᐤᐦ ᐃᐦᑖᐎᓐᐦ ᐊᓐ ᐙᔅᑳ ᐁᑎ ᐃᐦᑖᓄᐎᒡ ᑲᔦᐦ ᐱᒫᑎᓯᐎᓐ ᐯᔭᑯᓂᒡ ᐁ ᓇᑲᑐᐌᔨᐦᑕᑲᓄᐎᒡ᙮

ᐆ ᐁ ᐃᔥᐱᔑᐱᓯᐸᔨᔨᐦᒄ ᐁ ᐐ ᒥᔪᐸᔨᐦᑖᔨᐦᒄ ᒉᒀᓐ, ᒋᑲ ᒌ ᐃᔑᓈᑯᓐ ᐁᑳ ᓃᐦᑖᐦᒡ ᒉ ᒌ ᐃᔅᐸᔨᔨᒡ ᐊᓐ ᓇᓈᒥᒋᒻ ᐃᔥᐱᒥᐦᒡ ᐁ ᐃᔅᐸᔨᔨᒡ ᐊᓐ ᐁ ᒋᔑᑖᒧᑌᐦᒡ ᐊᔅᒌ᙮ ᐊᓂᒌ ᒀᓕᓰᐙᓐ ᐋᕕᓃᕐ ᑯᐯᒃ CAQ ᓇᒧᐃ ᒥᒄ ᐃᔑᓈᑯᓱᐎᒡ ᐁ ᓅᐦᑌᔑᐧᑳᐤ, ᒋᓂᑳᔑᓂᓈᓅ ᑲᔦᐦ ᐁ ᐃᔑᓈᑯᐦᐄᑯᔨᐦᒄ ᒬᐦᒡ ᐁ ᐐᒋᐦᑖᔨᐦᒄ ᐊᓐ ᐁ ᐗᓈᒋᐦᑖᑲᓄᐎᒡ ᐊᔅᒌᔫ ᐁᑳ ᒫᔥᑖᔨᐦᒄ ᐊᓂᔫᐦ ᒉᒀᔫᐦ ᐁ ᐗᓈᒋᐦᑖᒉᒥᐧᑳᐤᐦ ᐊᔅᒌᐦᒡ᙮

ᑯᐯᒃ ᔂᓕᑌᕐ ᐐ ᐸᐦᒋᔅᑎᓇᒻ ᐎᔦᔨᐦᑕᒨᓯᓇᐦᐄᑲᓂᔫ ᒉ ᒌ ᓂᑳᐦᐊᑲᓄᐎᒡ ᐊᓐ ᑳ ᒫᔮᑎᐦᒡ ᒉᒀᓐ ᐊᓂᑌᐦ ᐁ ᔦᐦᔦᐦᑕᑲᓄᐎᒡ ᐊᔅᒌᐦᒡ ᔖᔥ ᒉ ᒌ ᐃᐦᑕᑯᒡ ᐃᔥᑯᑕᒃ 2050 ᐃᔅᐸᔨᐦᑌ ᐊᔅᒌᐅᒋᔅᑖᓱᐎᓐ᙮ ᓂᑲ ᒌ ᐃᐦᑑᑌᓈᓐ ᐃᔮᐸᒡ ᒉ ᒌ ᐃᐦᑕᑯᒡ ᐁ ᐅᐦᒋ ᐱᐹᒥᐸᔨᐦᐄᓱᓇᓄᐎᒡ ᐋᑕ ᐁᑳ ᐋᐸᑎᐦᐧᑳᐤᐦ ᐅᑖᐹᓐᐦ᙮ ᒋᑲ ᒥᔪᑲᓇᐌᔨᐦᑖᑯᓐ ᐊᓂᔫ ᐊᔅᒌ ᑳ ᑲᓇᐌᔨᐦᑕᑯᒡ, ᓂᐲ ᐁ ᐅᐦᑖᒋᑯᐎᒡ ᑲᔦᐦ ᒥᔥᑎᑯᔅᑲᒥᑳᐦᒡ, ᓇᒧᐃ ᒋᑲ ᐃᔑᓈᑯᓐ ᑖᓐ ᐁ ᐃᔑᓈᑯᒡ ᐊᓂᒌᔥ ᑯᐯᒃ ᐁ ᐱᒥᐸᔨᑖᑲᓄᐎᒡ ᒉᒀᓐ᙮

ᐊᓂᑦᐦ ᔂᓕᑌᕐ ᐁ ᐱᒥᐸᔨᐦᑖᑲᓄᐎᒡ, ᐊᓐ ᒨᔥ ᐁ ᐃᔅᑯᐸᔨᒡ ᐁ ᑎᐸᐦᐄᑲᓄᐎᒡ ᐙᔅᑳᐦᐄᑲᓐ ᓇᒧᐃ ᒋᑲ ᐃᐦᑕᑯᓐ ᒦᓐ᙮ ᐁ ᐊᒎᐸᔨᐦᑖᑲᓄᐎᒡ ᐊᓐ ᐁ ᐃᔨᐦᒋᐸᔨᒡ ᐁ ᐃᑐᐦᑕᑯᒡ ᐙᔅᑳᐦᐄᑲᓐ ᐁ ᑎᐸᐦᐊᑲᓄᐎᒡ ᒥᔑᑯᒻ ᐱᐳᓐ $850 ᒋᑲ ᐃᔥᑯᐸᔫ ᐯᔭᑯᑌᓅ ᐙᔅᑳᐦᐄᑲᓐ᙮ ᑲᔦᐦ ᓂᑲ ᐐᑳᐴᐦᑖᓈᓐ ᒥᐦᒉᑐᒋᔐᒥᑖᐦᑐᒥᑎᓅ ᐙᔅᑳᐦᐄᑲᓐᐦ ᐁ ᐅᔥᑳᒡ ᒉᒀᓐ ᐁᑎ ᐃᑖᐸᑎᐦᒡ ᐁ ᐅᔑᐦᑖᑲᓄᐎᒡ ᐙᔅᑳᐦᐄᑲᓐ ᐁᑳ ᒥᔥᑕᐦᐄ ᐗᓈᒋᐦᑖᑲᓄᐎᒡ ᐊᔅᒌ ᒥᐦᒉᑐᑌᓅ ᒉ ᒌ ᐅᔅᒋᐙᔅᑳᐦᐄᑲᓀᐧᑖᐤ ᐆᑦᐦ ᑯᐯᑲᐦᒡ᙮ ᐁᐅᒄ ᒫᒃ, ᑯᐯᒃ ᔂᓕᑌᕐ ᒉ ᐅᔑᐦᑖᑦ 50,000 ᐙᔅᑳᐦᐄᑲᓐᐦ ᑲᔦᐦ ᐊᓂᑌᐦ ᒉ ᒌ ᐃᔮᐧᑖᐤ ᓇᓈᐦᑰ ᐁᑎ ᐃᑎᔅᑳᓀᓯᑖᐤ ᐄᔨᔫᒡ/ᐄᓅᒡ ᑲᔦᐦ ᐄᓄᐎᑦ ᐊᓂᑌᐦ ᐐᐐᑎᒣ ᑲᔦᐦ ᐲᑎᒣ ᐃᐦᑖᐎᓂᐦᒡ ᐁᑎ ᐃᐦᑖᐧᑖᐤ᙮

ᒥᐦᒉᑐᑌᓅ ᓇᒧᐃ ᒌ ᐃᔥᐱᔥ ᐃᔮᐌᐅᒡ ᔔᔮᓐᐦ ᐊᓂᔫ ᐁ ᐐ ᑎᐱᔦᐅᓰᐧᑖᐤ ᐙᔅᑳᐦᐄᑲᓂᔫ᙮ ᑯᐯᒃ ᔂᓕᑌᕐ ᒋᑲ ᐐᐦᑯᒋᐦᑕᒧᐌᐤ ᐙᔅᑳᐦᐄᑲᓐᐦ ᒉᒃ ᐐᐙᐤᐦ ᒉ ᒌ ᐃᔑᓈᑯᓯᑣᐤ ᒉ ᒌ ᑎᐱᔦᐅᓰᐧᑖᐤ ᑲᔦᐦ ᒉ ᒌ ᐃᔮᐧᑖᐤ ᑲᔅᒋᐦᐅᐎᓐ ᒉ ᒌ ᐋᐦᑯᐐᑑᑖᐙᒉᐧᑖᐤ ᐊᓂᔫ ᐙᔅᑳᐦᐄᑲᓂᔫ ᐁᑳ ᒉ ᒌ ᒪᒋᐦᓯᓈᓲᐧᑖᐤ᙮

ᔖᔥ ᓃᔥᑎᓅᐳᓐᐦ ᐊᓂᑌᐦ ᐅᑖᐦᒡ, ᒋᒌ ᐐᐦᑕᒫᑰᓈᓅ ᐁᑳ ᒋᓀᐅᔥ ᒉ ᐯᐦᐆᑦ ᐊᐌᓐ ᒉᒀᓐ ᐁ ᐃᔅᐸᔨᐦᐄᑯᑦ ᐊᓂᑌᐦ ᐋᐦᑯᓰᑲᒥᑯᐦᒡ ᐁ ᐃᔮᐦᒀᒋᐸᔨᒡ ᒉᒀᓐ ᑲᔦᐦ ᓂᑐᐦᑯᔨᓐ ᒉ ᒌ ᐃᔮᐙᑣᐤ ᐯᔭᑯᑌᓅ᙮ ᐊᓂᒌᔥ ᒫᒃ, ᓇᓈᒋᒻ ᐃᔨᐦᒋᐸᔨᔫ ᐁᑳ ᒌ ᐃᔮᐧᑖᐤ ᐊᐌᓂᒌ ᑯᐃᔅᒄ ᐆᔫ᙮ ᓕᒀ ᑳ ᓃᑳᓂᔥᑳᐦᒃ ᒌ ᐐᐦᑕᒻ ᐐ ᑲᔦᐦ ᐋᐦᒋᐆᐦ ᒉ ᐃᔅᐸᔨᔨᒡ ᒉᒀᔫ ᐁᔥᒄ ᒫᒃ ᐯᔭᑯᓂᒡ ᐃᐦᑕᑯᓐ ᒉᒀᓐ ᐁᑳ ᐋᐦᒋᐆ ᐃᔅᐸᔨᔨᒡ᙮ ᔖᔥ ᓂᑲᔅᒉᔨᐦᑕᒥᐦᐄᑯᓈᓐ ᒬᐦᒡ ᒥᒄ ᐃᔮᐦᑯᔨᐦᑑ ᐁ ᒪᒦᔕᐦᐊᑲᓄᐎᒡ ᒉᒀᓐ ᐁᑳ ᒌ ᒦᓄᐙᒋᐦᑖᑲᓄᐎᒡ᙮ ᓂᑲ ᒌ ᐃᐦᑑᑌᓈᓐ ᓂᔮᓐ ᒉ ᒌ ᒥᔅᑲᒫᐦᒡ ᒉᒀᓐ ᑌᑲᔥ ᒉ ᒌ ᒥᓄᐙᒋᐦᑖᔮᐦᒡ᙮

ᓂᑲ ᐅᔑᐦᑖᓈᓐ ᒉ ᒌ ᐋᐸᐦᐊᔥᑌᐧᑳᐤᐦ ᒥᓄᐙᑎᓰᐅᑲᒥᒄᐦ ᒣᔑᑯᒻ ᒌᔑᑳᐤᐦ 24/7᙮ ᓂᑲ ᐄᒉᓀᓈᓐ ᐊᓂᔫ ᒋᓀᐅᔥ ᐁ ᐯᐦᐆᐧᑖᐤ ᐊᐌᓂᒌ ᐊᓂᑌᐦ ᒥᑐᓀᔨᐦᑕᒧᐎᓐ ᒥᔪᐱᒫᑎᓰᐎᓐ ᐁ ᐋᐸᑎᓰᔥᑕᑲᓄᐎᒡ ᐌᔅ ᒥᑐᓀᔨᐦᑕᒧᐎᓐ ᒥᔪᐱᒫᑎᓯᐎᓐ ᑖᐱᔥᑯᓐ ᐃᑌᔨᐦᑖᑯᓐᐦ ᒥᔪᐱᒫᑎᓯᐎᓐ ᐁ ᓇᓈᑲᒋᐦᑖᑲᓄᐎᒡ᙮

ᓂᑲ ᐸᐦᒋᔅᑎᓈᓈᓐ ᔔᔮᓐ ᒉ ᒌ ᐃᐦᑕᑯᒡ ᐁ ᐱᒥᐸᔨᐦᑖᑲᓄᐎᒡ ᔖᔥ ᐁ ᐃᔦᔥᑯᔥᑌᒡ ᒉᒀᓐ ᑆᒧᔥ ᐁ ᐃᔮᐦᒀᒋᐸᔨᒡ ᒉᒀᓐ, ᐊᓐ ᐁ ᐃᔑᓈᑯᒡ ᐊᓂᒌᔥ ᐁᑳ ᓈᔥᒡ ᐐ ᐋᐸᑌᔨᐦᑕᑲᓄᐎᒡ᙮ ᐌᔅ ᒥᔪᐱᒫᑎᓯᐎᓐ ᑯᐃᔅᒄ ᐁ ᑲᓇᐙᐸᐦᑕᑲᓄᐎᒡ, ᔖᔥ ᑲᑕ ᐐ ᐃᐦᑕᑯᓐ ᒉᒀᓐ ᒉ ᒌ ᒥᔪᐸᔨᐦᑕᑲᓄᐎᒡ ᐁ ᐃᔦᔥᑯᔥᑌᒡ ᒉᒀᓐ ᑆᒧᔥ ᓈᔥᒡ ᐁ ᐃᔮᐦᒀᒋᐸᔨᒡ ᒉᒀᓐ᙮

ᐊᓂᑌᐦ ᐯᒋ ᐅᑖᐦᒡ, ᑯᐯᒃ ᑳ ᓃᑳᓂᔥᑲᐧᑳᐤᐦ ᒌ ᐐᐦᑕᒥᒡ ᒨᔥ ᒉ ᓃᑳᓂᔥᑖᐧᑖᐤ ᒋᔅᑯᑕᒫᒉᐎᓂᔫ, ᒥᒄ ᒫᒃ ᓇᒧᐃ ᐅᐦᒋ ᑖᐺᐅᓰᐅᒡ ᐊᓂᔫ ᑳ ᐐ ᐃᐦᑑᑕᐧᑳᐤ ᑖᐺ ᐁᑎᑑ ᒉ ᒌ ᒥᔪᐸᔨᒡ ᒋᔅᑯᑕᒫᒉᐎᓐ᙮

ᑯᐯᒃ ᔂᓕᑌᕐ ᒋᑲ ᐄᒉᓇᒻ ᐊᓂᔫᐦ ᐁ ᐃᔥᐱᔥ ᑎᐸᐦᐄᒉᑦ ᐊᐌᓐ ᐁ ᐐ ᒋᔅᑯᑕᒫᓱᑦ ᐊᓂᑌᐦ ᑳ ᐅᔅᒋᒋᔅᑯᑕᒫᓱᑣᐤ ᐁ ᓂᔮᔪᐳᓀᓯᐧᑖᐤ ᐊᓂᑌᐦ ᐄᔑ ᓂᔮᔪ ᐁ ᐃᔥᐹᔨᐦᒡ ᐁᑎ ᐃᐦᑖᐧᑖᐤ, ᐊᓂᒌ ᑳ ᒋᔐᒋᔅᑯᑕᒫᓱᐧᑖᐤ ᑲᔦᐦ ᐊᓂᒌ ᓇᓈᐦᑰ ᐋᐸᑎᓰᓈᐦᒡ ᐁ ᐄᔑ ᒋᔅᑯᑕᒫᓱᐧᑖᐤ᙮ ᓂᑲ ᐸᐦᒋᔅᑎᓀᓈᓐ ᐐᔓᐌᐅᓯᓈᑌᒡ ᒥᓯᐦᑌᔅᑲᒥᒄ ᒋᔅᑯᑕᒫᒉᐅᑲᒥᒄᐦ ᒉ ᒌ ᒥᔪᐸᔨᔨᑣᑲᓅᐧᑖᐤ ᐊᐌᓂᒌ ᑲᔦᐦ ᒉ ᒌ ᐄᒉᓇᑲᓄᒀᐤᐦ ᐊᓂᔫᐦ ᐁᑳ ᑎᐸᐦᐄᒉᐸᔨᐧᑳᐤᐦ ᒉᒀᔫᐦ; ᓂᑲ ᒋᐦᒋᐸᔨᐦᑖᓈᓐ ᐁ ᐊᒎᐸᔨᐦᑖᔮᐦᒡ ᒉᒃ ᒉ ᒌ ᐃᔑᓈᑯᒡ ᐁᑳ ᒉ ᒌ ᐃᔥᐱᔥ ᑎᐸᐦᐄᒉᑦ ᐊᐌᓐ ᐁ ᐐ ᒋᔅᑯᑕᒫᓱᑦ ᐊᓂᑌᐦ ᑳ ᐃᔥᐹᔨᐦᒡ ᒋᔅᑯᑕᒫᒉᐎᓂᔫ᙮

ᑯᐃᔅᒄ ᒉ ᒌ ᐱᒥᐸᔨᐦᑖᑲᓄᑳᐤᐦ ᐆᔫᐦ ᒋᔅᑯᑕᒫᒉᐅᑲᒥᒄᐦ, ᑯᐯᒃ ᔂᓕᑌᕐ ᓇᒧᐃ ᒥᔥᑕᐦᐄ ᒋᑲ ᐸᐦᒋᔅᑎᓀᐤ ᔔᔮᓐᐦ ᐊᓂᑌᐦ ᐄᔑ ᒋᐦᒋᐌ ᐋᐸᒋᐦᐋᑲᓐᐦ ᑲᔦᐦ ᒋᑲ ᒥᔪᓈᑯᐦᑖᑦ ᒋᔅᑯᑕᒫᒉᐅᑲᒥᒄᐦ, ᒋᑲ ᐃᔭᐦᒋᐦᑖᐤ, ᐊᔅᒌ ᐁ ᒥᔪᑲᓇᐌᔨᐦᑖᒡ ᑲᔦᐦ ᐊᓐ ᐁ ᐅᔑᐦᑖᑲᓄᐎᒡ ᒉ ᒌ ᒥᔪᑲᓇᐌᔨᐦᑕᑯᓯᑣᐅ ᒋᔅᑯᓂᐦᐋᒧᐙᑲᓇᒡ ᑲᔦᐦ ᐋᐸᒋᐦᐋᑲᓇᒡ ᐁᑎᑑ ᒉ ᒌ ᒥᔪᐸᔨᑳᐤᐦ ᒋᔅᑯᑕᒫᒉᐅᑲᒥᒄᐦ᙮

ᒉ ᒌ ᒋᔅᑯᑕᒧᐙᑲᓅᑖᐤ ᐊᓂᒌ ᓃᔥᑕᒥᐦᒡ ᒋᔅᑯᑕᒧᐙᑲᓇᒡ ᐊᓂᔫ ᑳ ᐯᒋ ᐃᔅᐸᔨᔨᒡ ᓇᓈᐦᑰ ᐁᑎ ᐃᑎᔅᑳᓀᓯᑣᐤ ᐄᔨᔫᒡ/ᐄᓅᒡ ᑲᔦᐦ ᐄᓄᐎᑦ᙮ ᑯᐯᒃ ᔂᓕᑌᕐ ᒋᑲ ᐅᔅᒋᒋᐦᑖᐤ ᒉᒀᔫ ᐁᑎ ᐃᑖᐸᑎᓂᔨᐦᒡ ᐁ ᒋᔅᑯᑕᒫᑲᓅᔨᐦᒡ ᑖᓐ ᑳ ᐯᒋ ᐃᔑᓈᑯᒡ ᐊᓂᑌᐦ ᐯᒋ ᐅᑖᐦᒡ ᑲᔦᐦ ᑖᓐ ᐯᒋ ᐃᔅᐸᔨᑖᐤ ᐄᔨᔫᒡ/ᐄᓅᒡ ᑲᔦᐦ ᐄᓄᐎᑦ ᒋᐦᒋᐌ ᐁ ᑖᐺᒥᑯᒡ ᑎᐹᒋᒧᐎᓐ᙮

ᑯᐯᒃ ᔂᓕᑌᕐ ᒋᐐ ᓈᑕᒫᒄ ᐊᓂᔫ ᓇᓈᒥᒌᒻ ᒥᔥᑕᐦᐄ ᐁ ᐃᔅᐸᔨᒡ ᒉᒀᓐ ᐁ ᑎᐸᐦᐊᑲᓄᐎᒡ ᐁ ᐐ ᐱᒫᒋᐦᐆᓈᓄᐎᒡ᙮ ᐁᐅᒄ ᒫᒃ ᐌᐦᒋ ᐎᔮᐸᒥᑎᔅᐧᑖᐤ ᐊᓂᒌ ᓂᑖᐸᒋᐦᐋᑲᓈᓂᒡ ᐁ ᔖᐳᒋᔅᒉᔨᐦᑕᒀᐤ ᐊᓂᔫ ᐁ ᐱᒥᐸᔨᐦᑖᑲᓅᔨᐦᒡ ᒉᒀᔫᐦ, ᐊᓐ ᐦᐋᕈᓐ ᐴᐊᓰ, ᑳ ᐅᐦᒋ ᑖᐦᒋᔥᑯᐙᑦ ᐊᓂᔫ ᐅᒋᒫᐤ ᐊᓂᑌᐦ ᔖᔮᓐ ᐁ ᐱᒥᐸᔨᐦᐋᑲᓄᐎᒡ SMEs, ᒫᑎᔫ ᑑᕗᕐ ᑲᔦᐦ ᓵᐃᒥᓐ ᑎᕃᒻᐸᓓᐃ ᐯᐱᓐ, ᐊᓂᒌ ᔔᔮᓐ ᐋᐸᑎᓯᐎᓐ ᐁ ᐱᒥᐸᔨᐦᐋᑲᓄᐎᒡ ᑲᔦᐦ ᒋᔅᑯᑕᒫᒉᓲᒡ ᑳ ᐃᔥᐹᔨᔨᒡ ᒋᔅᑯᑕᒫᒉᐅᑲᒥᒄ ᑳ ᒋᔅᑯᑕᒫᒉᐧᑖᐤ, ᐋᓓᐋᓐᑎᕌ ᓵᑳ ᒣᓐᑌᔅ, ᐊᓐ ᑳ ᑌᐱᐦᒋᔅᒉᔨᐦᑕᐦᒄ ᐊᔅᒌᐦᒡ ᐁ ᓈᑲᑐᐌᔨᐦᑕᑲᓅᔨᐦᒡ, ᑲᔦᐦ ᑲᕆᔅᑏᓐ ᑲᓪᐱᕐᑦ, CPA, MBA, ᒋᔅᑯᑕᒫᒉᓲ ᐊᓂᑌᐦ ᓛᕚᓪ ᒋᔅᑯᑕᒫᒉᐅᑲᒥᒄ ᑳ ᐃᔥᐹᒡ ᑲᔦᐦ ᑯᐯᒃ ᐁ ᒪᓯᓇᐦᐄᐸᔨᒡ ᔔᔭᓐ ᐁ ᐄᔑ ᓇᓈᑲᒋᐦᑖᑦ᙮

ᐆᒌ ᓂᑖᐸᒋᐦᐋᑲᓂᓈᓂᒡ ᑌᑲᔥ ᐐᐦᑖᑯᓂᔫ ᑖᓐ ᒉ ᐃᔑᓈᑯᓂᔨᒡ ᒉᒀᔫ ᒉ ᐋᐦᒌᔥᑕᐦᒀᐤ: ᒋ ᓂᑐᐌᔨᐦᑌᓅ ᑌᑲᔥ ᒉ ᓅᓱᓀᐦᐊᒥᒄ ᐎᔦᔨᐦᑕᒧᓯᓇᐦᐄᑲᓐ ᒉ ᒌ ᐐᒋᐦᐄᑯᐧᑖᐤ ᐸᐦᐯᔭᑯᑌᓅ ᔔᔮᓐ ᐅᐦᒋ ᐁ ᐅᐦᒋ ᓅᐦᑖᔑᒥᑯᒀᐤ, ᐅᔅᒋᓃᒎᒡ ᑲᔦᐦ ᒋᔐᔨᔫᒡ/ᒋᔐᔨᓅᒡ᙮ ᐊᓐ ᑯᐯᒃ ᔂᓕᑌᕐ ᓃᑳᓂᔥᑲᐦᑫ, ᓃᐦᑖᐦᒡ ᒋᑲ ᐃᔅᐸᔨᔫ ᐊᓐ ᐁ ᐃᔥᐱᔥ ᑎᐸᐦᐊᑲᓄᐎᒡ ᓇᒥᔅᒎᐅᔥᑯᑌᐤ᙮ ᑲᔦᐦ ᒋᔅᑯᑕᒫᒉᐎᓐ ᐁᑎ ᐃᑖᐸᑎᐦᐧᑳᐤᐦ ᒉᒀᔫᐦ ᓇᒧᐃ ᒋᑲ ᐃᔥᐱᔥ ᑎᐸᐦᐊᑲᓅᐦ, ᑲᔦᐦ ᒉ ᒌ ᒥᔪᑲᓇᐌᔨᐦᑕᐦᒃ ᐊᐌᓐ ᐅᐐᐱᑦᐦ ᑲᔦᐦ ᐊᓐ ᐁ ᐴᓯᓈᓄᐎᒡ ᐅᑖᐹᓐ ᐁ ᐱᐹᒥᐸᔨᓈᓄᐎᒡ ᐋᐱᐦᑑ ᒋᑲ ᐃᔥᐱᔥ ᐊᒎᐸᔫ᙮

ᒦᒋᒻ, ᐗᐌᔓᐎᓐ ᐁ ᐃᑖᐸᒋᐦᑖᑲᓄᐧᑳᐤᐦ, ᓂᑐᐦᑯᔨᓐ ᑲᔦᐦ ᐋᒋᐦᐅᐎᓐ ᓇᒧᐃ ᐄᐙᒡ ᒋᑲ ᑎᐸᐦᐊᑲᓅᐦ ᐊᓐ ᐃᔥᐱᔥ ᐁ ᐄᔑ ᐱᒥᐸᔨᐦᒡ ᐁ ᐋᔨᒥᑦ ᒉᒀᓐ ᐁ ᐅᑎᓂᒑᓄᐎᒡ᙮ ᒫᒋᒡ ᒫᒃ, ᐊᓐ $18 ᒋᑲ ᐃᔥᐱᔥ ᐃᔅᑯᐸᔫ ᐁ ᑎᐸᐦᐊᒧᐙᑲᓄᐎᒡ ᐊᐌᓐ ᐁ ᐋᐸᑎᓰᑦ ᐯᔭᐧᑳᐤ ᐁ ᒌᓂᒀᓂᑌᔨᒡ ᐊᓂᒌ ᐅᔅᒋᓃᒎᒡ ᑲᔦᐦ ᐯᔭᑯᑌᓅ ᒉ ᒌ ᐃᔥᐱᔥ ᐄᔅᐸᔨᐧᑖᐤ ᔔᔮᓐ ᐁ ᐄᔑ ᐱᐦᑯᐦᐋᐧᑖᐤ ᐅᐐᒋᐙᐦᒡ ᑖᓐ ᒥᒄ ᐁ ᐃᔥᐱᔥ ᓂᑐᐌᔨᒫᐧᑖᐤ᙮ ᑲᔦᐦ ᒋᑲ ᐃᔅᑯᐸᔫ ᒋᔐᔨᔫᔔᔮᓐ ᒉ ᒌ ᐐᒋᐦᐋᑲᓄᐧᑖᐤ ᒋᔐᔨᔫᒡ ᐊᓂᒌ ᑳ ᓇᒋᔥᑲᒀᐤ ᐅᔫ ᐁ ᐃᔅᑯᐸᔨᔮᑦ ᒉᒀᔫᐦ ᐁ ᐅᑎᓂᒉᐧᑖᐤ᙮

ᑯᐯᒃ ᒥᔥᑕᐦᐄ ᐁᑎᑑ ᓂᑐᐌᔨᐦᑖᑯᓲ ᒉ ᒌ ᐅᔅᒋᒋᐦᑖᑦ ᐊᓂᔫ ᑎᐯᔨᐦᒋᒉᓰᓈᐦᒡ᙮ ᓂᑐᐌᔨᐦᑖᑯᓲ ᒉ ᒌ ᐅᔅᒋᒋᐦᑖᑦ ᐁ ᐱᒥᐸᔨᐦᑕᑲᓅᔨᐦᒡ ᐊᓂᑌᐦ ᐄᔑ ᐐᔓᐌᐎᓐᐦ ᐁ ᐱᒥᐸᔨᐦᑕᑲᓅᒀᐤᐦ᙮ ᑯᐯᒃ ᔂᓕᑌᕐ, ᓂᐐ ᓅᑯᑖᓈᓐ ᒉ ᒌ ᐯᔭᑯᑳᑎᓲᔮᐦᒡ ᓇᒧᐃ ᐅᐦᒋ ᐁ ᐋᑐᐌᔨᒥᑎᔅᐧᑖᐤ ᐐᑎᒣ ᐊᐌᓂᒌ ᓀᔥᑦ ᐁ ᑯᔥᑖᒋᔮᐦᒡ ᒉ ᒪᒣᐦᒌᔨᔮᐦᒡ, ᒥᒄ ᓂᐱᐦᑯᐦᓯᔨᐦᑌᓈᓐ ᐁ ᐆᔥᑳᑦ ᒫᒨᓰᐎᓐ ᐊᓂᑌᐦ ᐁ ᐋᐸᑎᓰᔥᑕᑲᓄᐎᒡ ᒉᒀᓐ ᐁ ᒥᔪᐸᔨᐦᑖᑲᓄᐎᒡ᙮ ᓂᐐ ᐅᔑᐦᑖᓈᓐ ᒥᓯᐦᑌᔅᑲᒥᒄ ᑳᓇᑖ ᒥᓯᐌ ᐊᐌᓐ ᐁ ᐋᐸᑌᔨᐦᑖᑯᓯᑦ᙮ ᐁ ᒪᔥᑰᑳᐴᓈᓄᐎᒡ ᐊᓂᑌᐦ ᐄᔑ ᐁ ᒪᒥᒋᓯᔨᔨᐦᒄ ᐯᔭᑯᑌᐅᓯᐎᓂᐦᒡ ᒉ ᒌ ᐄᔑ ᐋᐸᐦᐄᐸᔨᐧᑖᐤ ᐃᔥᒀᐦᑌᒥᒡ ᑲᔦᐦ ᑯᑕᑲᒡ ᐊᐌᓂᒌ ᒉ ᒌ ᐋᐸᐦᐊᒧᐙᑲᓅᐧᑖᐤ᙮

ᐸᐦᑳᓇᐸᔨᐦᐆᔨᐦᑫ ᐁᑯᑦᐦ ᒉ ᒪᔅᑲᒥᒄ ᐋᐦᒋᐆᐦ ᒉ ᐃᔅᐸᔨᒡ ᒉᒀᓐ ᐆᑦᐦ ᐲᑎᒣ ᐁ ᐃᐦᑖᔨᐦᒄ ᒥᓯᐌ ᐊᐌᓐ ᐁ ᑖᑯᐦᐆᑯᑦ᙮ ᐐ ᑴᔅᒋᓈᑯᐦᑖᔨᐦᑫ ᐆ ᐊᔅᒌ, ᐆᑦᐦ ᑯᐯᑲᐦᒡ ᒋᑲ ᒋᐦᒋᐸᔨᐦᑖᓅ᙮ ᓂᐐ ᒥᔪᑲᓇᐌᔨᐦᑌᓈᓐ ᐊᔅᒌ ᑲᔦᐦ ᓂᐐ ᐐᒋᑳᐴᔥᑐᐙᓈᓂᒡ ᐊᓂᒌ ᑯᑕᑲᒡ ᒥᓯᐦᑌᔅᑲᒥᑳᐦᒡ ᑳ ᐄᔑ ᓅᑯᓯᐧᑖᐤ ᐁ ᒥᔪᑲᓇᐌᔨᐦᐧᑕᑳᐤ ᐊᔅᒌᔫ, ᒥᒄ ᒫᒃ ᑯᐯᒃ ᐁᔥᒄ ᐄᔑ ᐊᔑᒋᐸᔨᔫ ᐊᓂᑌᐦ ᑳᓇᑖ ᐁ ᐱᒥᐸᔨᐦᑖᑲᓄᐎᒡ ᐱᒦ ᐁ ᐅᐦᒋ ᐃᐦᑕᑯᒡ ᐋᐸᒋᐦᐆᐙᒉᐎᓐ᙮ ᐁᑎᑑ ᐐ ᒥᔪᐱᒫᑎᓰᔨᐦᑫ, ᒋᓂᑐᐌᔨᐦᑌᓅ ᒋᔮᓅ ᒉ ᒌ ᑎᐱᔦᐅᓰᔨᐦᒄ ᐊᓂᔫᐦ ᒉᒀᔫᐦ ᐁ ᐅᐦᒋ ᐱᒥᐸᔨᐦᐄᓲᐙᒉᔨᐦᒄ᙮ ᓂᔮᓐ ᓂᐐ ᐅᔑᐦᑖᓈᓐ ᓂᒣᔅᑲᓈᒥᓈᓐ ᑲᔦᐦ ᐐᒋᐋᐸᑎᓰᒥᑐᐎᓐ ᐊᓂᒌ ᓇᓈᐦᑰ ᐁᑎ ᐃᑎᔅᑳᓀᓯᑖᐤ ᐄᔨᔫᒡ/ᐄᓅᒡ ᑲᔦᐦ ᐄᓄᐎᑦ, ᒥᒄ ᒫᒃ ᑳᓇᑖ ᐅᐐᔓᐌᐎᓐ ᓂᓂᑳᔑᒥᑯᓈᓐ ᐆ ᒉ ᒌ ᐃᐦᑑᑕᒫᑦ᙮

ᒋᐦᒋᐌ ᐸᑯᐦᐅᐎᓐ ᐄᔑᒋᔓᐌᒥᑯᓐ ᐁ ᐃᔮᔨᐦᒄ ᐊᓐ ᒪᔅᑯᓯᐎᓐ ᑲᔦᐦ ᑲᔅᒋᐦᐅᐎᓐ ᒋᔮᓅ ᒉ ᒌ ᐎᔦᔨᐦᑕᒥᒄ ᑖᓂᑌᐦ ᐙ ᐄᔑ ᐱᒥᐸᔨᐦᐄᑎᓲᔨᐦᒄ᙮ ᒥᒄ ᒫᒃ ᐯᔭᑯᓐ ᐆ ᒉ ᒌ ᐱᐦᑯᐦᑖᔨᐦᒄ ᐁᐅᒄ ᐆ ᐸᐦᑳᓂᐸᔨᐦᐆᔨᐦᑫ ᑯᐯᒃ ᐁ ᐯᔭᑯᑌᐅᓯᔨᐦᒄ ᐊᔅᒌ᙮

ᐄᓅ ᐊᔨᒨᓐ