Aln8ba8dwaw8gan

Wji iawigaden, Manon Massé ta Gabriel Nadeau-Dubois kwtalmegwzijik kasowiak.

M8ww8k8jik Québec solidaire chajig8wosak ta askwa apchikawak François Legault ta wladakakji wji Kibekiak ta Kibekiskwak wwal8wzow8ganw8.

Wji m8jatak mziwi wligekil

N’n8ji wladakabna apchiwi azowikizgat.


N’n8ji ik8l8bna lakamigwezoak apchiwi ali kedm8g8wzoak.


N’n8ji meskamobna wigw8mal ta lakamigwezoakji kadi manohomak wigw8mal.


N’n8ji pilwitobna nspiwi s8glamasowigamikok ta n’n8ji nanawalm8bna pm8wzowinnoak wwigw8mw8ïkok.


N’n8ji wlito ktagamikw wji mziwi pm8wzowinnoak nspiwi Aln8bak.

Nikw8bi Kibek wd8jemow8ganw8 pilwosao.


Nis8mkwaki taba ngwedatgwa kasigadenoaïwi, m8ww8k8jikji Québec solidaire pilwitoak ta megenemoda wkin8baw8ganw8 ta wkagazwidah8zw8ganw8.



« K’wjilhabna nalwiwi ala k’pilwigibna kanwa tatbigen. Nd’achwaldamobna wl8wzow8gan nikw8bi ta nik8niwi. Neg8zoak wlitawabanik m8wkaw8gan ta aw8sisak aoak, megenemoda wskigek kizt8zik alalokamekji. N’migak8m8 nspiwi agm8w8. M8ww8k8jik Québec solidaire aoak »


« Kdakik neg8nigijik m8ww8k8jik w’tbalm8w8 kiona kanwa nd’achwi tbalmezibna nikw8bi. Nigik nda nanawaldowiak agakid8gan. Nigik nda nanawalmawiak wan8daminajik. Nigik nda nanawaldowiak kchi agwejagakil alokagamikol. Nikw8bi, megen8da wskigijik lidbezowinnoak. »


M8ww8k8jik Québec solidaire wibita chajibaldamok CAQ.

Ngwed8s Aln8bak kadi lidbezoak wji m8ww8k8jik Québec solidaire atali tbald8zimek Kibek.


Aln8bak msalowiak nspiwi niona, natamia Kibek.

Nigik Aln8bak kadi lidbezoak

Maïtée Labrecque-Saganash

Ungava

Benjamin Gingras

Abitibi-Est

Michaël Ottereyes

Roberval

Gérard Briand

Saint-Laurent

Jacques Thériault-Watso

Nicolet-Bécancour

Uapukun Mestokosho

Duplessis

M8ww8k8jik Québec solidaire kadi wlitaw8w8 Kibek nspiwi mziwi Aln8bak akik. M8ww8k8jik Québec solidaire kadi wijokaw8 mziwi m8wkawinnoak wji ali atali tbald8zimek Kibek achwi wlest8wadin wji awakat8zik, ik8d8zik ta nanawald8zik pizwigamikw.Wji niona, m8wkawinnoak achwi t8tbalmezoak, ta achwi nanawaldamen8 wl8dwaw8ganw8, ta atali tbald8zimek Kibek wd’achwi nanawalm8 mziwi Aln8bak, kanwa achi phanemok ta aw8sisak. Chigaji m8ww8k8jik Québec solidaire lidbezoak, n8ji 8lemitoak wji sasaginnow8gan machinajik ala wanialezojik aw8sisak aln8baïatalagakidimek.

N’n8ji wijokabna m8wkawinnoak, ni n’n8ji pmighasibna mziwi neg8ni atalagakidimek akiikok, ni n8ji pabachit8zik lagidamw8gan ta n8ji kizidah8damek. Chaga wd’achwaldamen8, n’n8ji wijokabna lakamigwezoak wji machinajik wkwsilawihodw8ganw8l.


N’n8ji kwsih8bna machinajik aw8sisak ta neg8ni agakimzowinnoak aln8baïatalagakidimek, ta achi wlakamigwezomw8 ta wm8wkawinnow8 wji wlest8wadw8gan, m8ww8k8jik Québec solidaire n8ji mildoak tbalmezw8gan magaïwi Kibekiak ta Kibekiskwak nasinska skamonkasek wji Journée vérité et réconciliation.


Nd’achwi channemenana chajabnigaw8gan ajichiwi Aln8baïkok.


Nitamiwi, n’n8ji ntonemenana principe de Joyce lagidamw8gan.


M8ww8k8jik Québec solidaire kinidah8zoak pizwigamikw nitamiwi. N’kadi ik8damenana pizwagamikw Kibek nspiwi kdakil ktagamikol wskidgamikwa.


Nis8mkwaki taba nisinska taba nis kasigadenek. N’kadi kin8baïbna ta n’kadi kagazwidah8zobna, kz8wado.


N’kadi m8wialosadasinna pm8wzowinnoak kchi odanaïkok ta akiikok, n’kadi ik8damenana pizwagamikw, ta achi pm8wzowinnoak kadi wal8wzoak.


Nikw8bi, pilwikizgat, ta sagp8wlezabdaji nik8niwi kanwa atali tbald8zimek Kibek palaloka. CAQ majadaka, kanwa achi aloka apchiwi ta walilawato kchi agwejagakil alokagamikol.


M8ww8k8jik Québec solidaire waj8nemok kizt8zik alalokamekji agidamiwi, kagazwidah8iwi ta wl8mawaldamiwi, nigaji Kibek pakigen.


N’n8ji kiznem lagidamw8ganal ni pm8wzowinnoak ndaba waj8nawiak skwdaïwaginak, kanwaji negemkannoak. Nd’ik8damenanaji atala nanawalm8mek awaasak, siboal ta kpiwi p8paami wji waïjiwi.


Megen8da m8ww8k8jik Québec solidaire, wd’ik8damen8 pizwagamikw.


Wji nisinska kasigaden, pakaldamikhowamek pm8wzowinnoïkok ali nda atalsko8bowiak s8glamalsowigamikok ta n8ji wanaskaw8w8 nodsipelowajik. 8dok8l8mek : sahagamezen8zik nanawalgaw8ganal.


Wagit8zo ta n8ji matanaskt8zik lest8wadw8gan.


N’n8ji mildonana nanawalgaw8ganal m8wis8glamalsowigamikwikok kwanikizgak ta tebokwak waïjiwi.


N’n8ji kzikigaw8bna wan8daminajik wji ali nd’achwi wijokagamibna achi.


N’pahamaldamenawa ws8glamalsow8ganw8 pm8wzowinnoïkok, nikw8bi majin8gwat. Chaga pm8wzowinnoak wlitbamalsoak, nda akwamalsowiak.


Kchaïak kizi 8jigadmak wigw8mikok kwsilahodowi, nspiwi wlakamigwezomw8, tbaldamoak. Nd’8bankaw8bna nanawalgajik nod8ïwi n8nneda m8niak ali Tesasem8nkik ala Tanemakik. M8ww8k8jik Québec solidaire n8ji nanawalm8nna nisda paami kchaïak wwigw8mikok, nigik kizi 8jigadmak wwigw8mikok, kz8wado.

Pm8wzowinnoak achwi wliwigoak ta achwiba waj8nemok wligijik wigw8mal, kz8wado. M8ww8k8jik Québec solidaire nat8wi8jik ngwejiwi ta waj8nemok kizt8zik alalokamekji wl8mawaldamiwi ta kagazwidah8iwi wji tagasesenol wigw8mal.

M8ww8k8jik Québec solidaire n8ji channemen8 wz8mi8bankaw8gan wji wigw8mal. Chaga n’channemobna wz8mi8bankaw8gan, ni lakamigwezoak n8ji maanemen8 ns8zek kasatgwa taba n8nninska m8niak ngwejigadenewaïwi pab8miwi. Ta achi, m8ww8k8jik Québec solidaire n8ji wlikaw8w8 k8kas8mkwaki wji kedm8gilhajik ni w’n8ji waj8nemok wligekil ta pakigenol wigw8mal.


Nalwiwi Kibek, lakamigwezoak n8ji achwaldamen8 nilil wigw8mal. Matanaskiwi, m8ww8k8jikji Québec solidaire wikaw8n8 n8nninska kas8mkwaki wigw8mal wji lakamigwezoak kanwa achi wji nigik Aln8bak wigoak kchi odanaïkok ala sigwniganikok. Nikw8bi, nawji lakamigwezoak nda man8homowiak wigw8mal, wz8mi kz8wadoak. M8ww8k8jik Québec solidaire n8ji awikhamen8 kizt8zik alalokamekji kagazwidah8iwi ni n8ji manohomok wigw8mal ta w’n8ji 8kolhamen8 lakamigwezoïkok nilil kz8wadoak nod8ïwi.

8bankaw8mek nod8ïwi, alagwahal8wajik mawiaw8gan. M8ww8k8jik Québec solidaire n8ji wijokaw8w8 pm8wzowinnoak wji ali pita 8bankamok. Kizi n’meskaw8bna p8ziji ntadokak pm8wzowinnoak wji m8niwawizw8gan, Haroun Bouazzi aloka m8nigamikok, Mathieu Dufour ta Simon Tremblay Pepin agakigamoak ta agakimzoak m8niwawizw8gan, Alejandra Zaga Mendez agakimzo m8niwawizw8gan pizwagamikok, ta Christine Gilbert agakigamo Université Laval, waj8nem MBA ta w’mol8wawaldamen Kibekilategwaodw8gan.

N’s8baskibna : nd’achwaldamobna kizt8zik alalokamekji pabakiwi nspiwi m8ni wji lakamigwezoak, aw8sisak ta kchaïak.

Nd’achwaldamobna kasanowigamek awikh8zik nod8ïwi wji wasakwlhaniganal. N’n8ji channemenna wz8mi 8bankaw8ganal wji atalagakidimek, n’n8ji 8bankaw8nna kad8bitaphowajik ta n’n8ji 8bankaw8nna m8wialosadasow8ganal pabasiwi.


Ndaba n’wdnemowenana m8ni pagaïwi wji mijow8ganal, nbizonal ta lasawaw8ganal, nd’askawitonnaji pilwim8niwawizw8ganal. Matanaskiwi, nd’achwi mildonna p8paami alagwahal8wajik, lli ns8zek kas8kaw m8niak wji nged8mkipoda, n’kadi wijokam8nna aw8sisak ta kedm8gilakamigwezoak.Nd’achwi mildonna paami 8bank8wadw8gan ligadenowaïwi wji kchaïak, wzig8wzoak wji ali pita 8bankamok.


Nd’achwi mildonna paami 8bank8wadw8gan ligadenowaïwi wji kchaïak, wzig8wzoak wji ali pita 8bankamok.


Kibek, kd’achwi megen8bna wskigijik lidbezowinnoak. Kd’achwaldamobna pilwigek atali tbald8zimek.


M8ww8k8jik Québec solidaire nd’achwaldam8nna tbalmezow8gan, nda n’chajidah8mwinna awanochak ta nda n’waniadowinna kibekil8wzow8gan, niga n’kadi pilwidah8damenana m8wkaw8gan, nd’achwaldamobna ktagamikw wji mziwi.

Kibekiiak achwi alamikaw8nna awanochak wig8damiwi. Waj8nemoda ktagamikw, msih8da m8wkaw8gan. Kanwa nd’achwi m8jatobna Kibek.


N’kadi ik8damenana pizwagamikw ta n’kadi kwagwadaloka nspiwi kdakil pakigekil ktagamikol, kanwa askwa k’waj8nemobna kchi agwejagakil alokagamikol Kanadak.


N’kadi tbaldamenana km8niwawizw8ganna ta kwal8wzow8ganna, kanwa nda k’tbaldamownana.


N’kadi tbaldamenana achwi pajidbilh8k ta nd’achwi podawazibna nspiwi Aln8bak, kanwa lagidamw8ganal channemawak kiona.


Wji tbalmezow8gan, nd’achwi kizidah8zibna kasiwi.


Nd’achwi wlitonana Kibeki ktagamikw.

Ruth Messier Agente officielle

QUÉBEC SOLIDAIRE 2022